УИХ-ын ээлжит бус чуулганы үеэр УИХ-ын гишүүн У.Хүрэлсүх, Г.Баярсайхан нар хоорондоо маргалдаж, улмаар зодоон цохиондоо хүрсэн нь өнгөрсөн долоо хоногийн дуулианы нэг хэсэг байлаа. Болсон явдалын талаар УИХ-ын гишүүн Г.Баярсайханаас дэлгэрэнгүй хариулт авлаа.

-У.Хүрэлсүхтэй яагаад гар зөрүүлэхэд хүрэх болов оо?
-УИХ-ын чуулган болсон. Чуулганы хуралдаанаар маргаан болсон. Энэ үед У.Хүрэлсүх “Муусайн “П”-уудаа” гэсэн хараал урсгасан. Түүний дараа их хурлын дарга луу “чи томрох болоогүй шүү” гэсэн дарамтлах аястай үгийг тал тал тийш нь хэлж байсан. Би УИХ-д тавь дахь жилдээ сууж байна. Чуулганы хуралдаанд анх удаа ийм “П” гэсэн хараалыг сонссон. Энэ бол байж болохгүй, төрийг доромжилж буй зүйл. Энэ бол үнэхээр эмэгнэл. УИХ дээр маргалдаж, хэрэлдэж, чи би дээрээ тулах зүйл байдаг. Гэвч тэглээ гээд их хурлын гишүүд биендээ хүндэтгэлтэй ханддаг. Над дээр ирээд өдөж янз бүрийн үг хэлсэн. Тэрийг нь би хэлээд яахав. Ер нь У.Хүрэлсүхийн бухимдалтай байгаад би буруугүй шүү дээ. Ардын нам ялагдсанд миний буруу байхгүй, бүлгээ байгуулаагүй нь миний буруу байхгүй биз дээ. Хүрэлсүх генесикээ өгсөн нь миний буруу биш. Миний хувьд У.Хүрэлсүхтэй яриад байх зүйлгүй. Бид хуулийн дор амьдардаг, УИХ-ын гишүүн ч бай, ерөнхийлөгч ч бай, жирийн иргэн ч бай бүгдээрээ хуулийн хариуцлага ижил тэгш хүлээж байх ёстой. Цаашид хэрхэх нь хууль хяналтын байгууллагын л ажил байх. Миний зовлогыг нэг дэлсээд авсан байна. Миний зоригийг бол мөхөөхгүй. Би өөрийн байр сууриа л илэрхийлсэн. Тэр намайг их гүтгэсэн байна лээ.

-Та чуулганы хуралдаан дээр ямар үг хэлсэн юм бэ. У.Хүрэлсүхтэй холбоотой үг хэлсэн үү?
-Бид дотороо байр сууриа хэлдэгээрээ л ярьж байсан.Ийм шоронгийн “П” гэсэн хараал хэлж болохгүй гэж хэлж байсан.
-Таныг У.Хүрэлсүхэд хандан”Чи шоронд суух ёстой хүн гэж хэлсэн” гэсэн мэдээлэл хэвлэлээр цацагдсан байна?
-Би нэг ч удаа шорон гэсэн үг хэлээгүй. Тэр чуулганы протокол дээр байгаа байх. Тэр намайг гүтгэж байна. Энэ асуудлыг хуулийн байгууллага хэрхэхээ цаашид шийдэх байх аа.
-Өөрийг чинь юу гэж дуудаж чуулганы танхимаас гаргасан юм бэ?
-Муухай муухай үг хэлсэн. Шаардлагатай бол тэр зохих байгууллагад нь хэлнэ. Намайг гараад ир гэсэн. Тэгэхээр нь би их бухимдалтай байгаа юм байна даа гэж бодсон. Гараад уулзая гэж байгаа бол тусдаа уулзаад бухимдал нь тайлагдах болов уу гэж бодоод муу юм бодолгүй гарсан. Би цохиод авна гэж бодоогүй.
-Хэн нь эхэлж заамдаж авсан юм. Таныг эхэлж хоолойг нь боосон гээд байсан?
-У.Хүрэлсүх. Тэр намайг эхэлж барьж авсан. Бүх зүйл баримттай байгаа шүү дээ. Тэр үед бичлэг хийж байсан телевизийн камераас үнэн зөвийг харж болох байлгүй.
У.Хүрэлсүх түүнээс хойш тантай холбогдсон уу. Хүнээр дамжуулаад ч юм уу?
-Оролдлого хийсэн. Уулзая гэсэн хүсэлт дамжуулсан.
-Та шүүхийн байгууллагад хандсан уу?
-Миний хандах хандахгүй асуудал хамаагүй. Шүүхийн байгууллагын асуудал, өөрсдөө мэдээд шалгаад явах байх. Энэ үйл явдал бол олон нийтийн газар танхайрсан. Тийм учраас хуулийн хүрээнд шийдэгдэх байх. Монгол төрийн ариун өргөө, Төрийн ордонд гишүүдийгээ харааж доромжилж байна, энэ бол байж болохгүй зүйл. УИХ нэг ангийн салаа цэрэг биш шүү дээ. Монгол төрийн эрх барих дээд байгууллага. УИХ-ыг нэг салаа цэрэг сууж байна гэж бодоод байх шиг байна. Би У.Хүрэлсүхээс ялгарах юм бол ард түмний саналаар сонгогдсон. У.Хүрэлсүхийн хувьд нам нэрийн дор жагсаалтаар орж ирсэн хүн. Чуулган бол төрийн үйл ажиллагаа явуулах дээд хэлбэр. Энд тийм хараал хэлэх нь хамгийн зохисгүй.

-У.Хүрэлсүхтэй ямар нэгэн хувийн маргаан, хонцогнол байхгүй биз дээ?
-Тэр хүнтэй энээ тэрээ юм байхгүй. Энд тэнд хүн амьтан цохиж цодоод яваа л сураг дуулддаг байсан. Өөр энэ хүний талаар мэдээлэл байхгүй.

Т.АМУР