Оюутолгой компани Айвенхоу Майнзын мэдлээс алгуурхан гарч Рио Тинто хэмээх мангасын аманд орсон билээ. Тус компани наймдугаар сарын 15-нд баяжуулах үйлдвэрийнхээ нээлтийг хийх төлөвлөгөөтэй байсан ч шинэ Засгийн газар байгуулагдах үйл явцтай давхацсан тул арга буюу хойшлуулжээ. Учир нь, шинэ Ерөнхий сайд Н.Алтанхуяг болон Уул уурхайн сайд Д.Ганхуяг нарын дарга, сайд нарыг байлцуулж байж энэхүү ёслолын арга хэмжээгээ хийх нь зүйтэй гэж үзжээ. Энэ хооронд Оюутолгойн ажилчид оройн 19 цаг 30 минутаас 21 цаг 30 минутын хооронд шар айраг шимж шаггүй найрладаг болсоор удаж байна. Үүнийхээ дараа үдэшлэгт орж салам бүжиглэх нь монголчуудын ухамсарт тааруулсан бодлогыг гадаад удирдлагууд нь явуулж байгаагийн нэг жишээ юм.

Оюутолгойгоос 10 гаруй километрийн зайд орших Ханбогд сум өнөөдөр ямар ч цэвэр усны нөөцгүй байхад энэхүү гэрээг хийсэн тухайн үеийн сайд нар ганцхан сумыг цэвэр усаар хангуулах асуудлыг нэг мөр шийдвэрлэж чадаагүй нь манай дарга даамлууд амьдралаас хэр зэрэг хөндий гэдгийг харагдуулна. Тэд Оюутолгойн урьдчилгаа 150 сая ам.долларыг авах гэж улайрсан болохоос бус улаан элс эргэлдсэн ханбогдчуудыг ундны усаар хангах асуудлыг урьтал болгосонгүй.

Өнөөдөр урд хөрш рүү зөөж буй нүүрсийг даруй 30 орчим жил олборлоно хэмээн ярьж буй ч 60-100 тонны даацтай Норд бенз машин 600-г захиалан авч 24 цагийн туршид зөөхөөр 1800 жолоочийг гурван ээлжлээр ажиллуулахаар болжээ. Энэ байдлаар аравхан жилийн дотор Оюутолгойн эд баялаг гадагшаа гарна гэсэн үг. Бидний муулах дуртай орос ах нар Эрдэнэтийн ГОК-ыг ашиглалтад оруулаад зогсохгүй бүхэл бүтэн орон сууцны хороолол босгож цогц арга хэмжээ авсны зэрэгцээ хаа байсан 70 километрийн зайд орших Сэлэнгэ мөрнөөс ундны ус татах шугам тавьсан нь өнөөдөр бодит түүх болон үлджээ.

Гэтэл магтах дуртай канадчууд маань орос ах нарын дэргэд олиггүй болох нь ганцхан энэ жишээнээс харахад тодорхой болж байна. Өнөөдөр тэнд пөөнийсөн халтар хэдэн гэр, ганц хоёр давхар блок болон сэндвичин байшин байгааг үл тооцвол Монгол оронд ашиг болон үлдэх олигтой нэг ч объект байхгүй байгаа нь “Алтыг нь аваад авдрыг нь хаяна” гэгчтэй адилхан үйл явдал болж байна.
А.Харанга /www.wikimon.mn/