Өнгөрч буй долоо хоногт улс төрийн нам эвслүүд намын дотоод зохион байгуулалт тэр дундаа Н.Алтанхуягийн Засгийн газарт орж ажиллах сайдууд, дэд сайд,

Өнгөрч буй долоо хоногт улс төрийн нам эвслүүд намын дотоод зохион байгуулалт тэр дундаа Н.Алтанхуягийн Засгийн газарт орж ажиллах сайдууд, дэд сайд, Төрийн нарийн бичиг, агентлагийн дарга нарын асуудалд анхаарлаа хандууллаа.

МАН үлгэрээ ярьсаар…

МАН-ын УИХ-д суудал авсан ги­шүүдийн хувьд өнөөх л бүлэг бай­гуулах хуулийн төслийн асуу­далд анхаарлаа хандуулж бай­сан бол Нийслэлийн МАН-ын хороо хуралдаж дэд даргаа то­милсоноос өөр зүйл болсонгүй. Тойр­гоо алдаж, нэг хэсэгтээ на­мын удирдлагуудтайгаа “дайн зар­лах” дөхөөд байсан УИХ-ын гишүүн асан Ш.Сайхансамбуу энэхүү албан тушаалд очиж “амаа таглууллаа”. Нийслэлийн МАН-ын хурлаар зарим дүүргийн намын хороодын асуудлыг хэ­лэлцсэн тухай эх сурвалж хэл­сэн. УИХ-ын гишүүн асан Д.Очирбат Чингэлтэй дүүргийн на­­мын хорооны даргын алба ха­­ших сонирхолтой учраас, өөрий­­гөө эл албанд томилуулах асууд­лаар Ц.Сандуй даргатайгаа уулз­сан ч экс гишүүний саналд тат­галзсан хариулт өгсөн аж. Ц.Сан­дуй дарга “Өмнө нь та Чингэлтэй дүүр­гийн Засаг дарга байсан, одоо Чингэлтэй дүүргийн МАН-ын хорооны дарга болохыг санаархаж явах нь үнэхээр таалагдахгүй байна. Насаараа та энэ дүүргийг эзэгнэнэ гэж бодоо юу. Ингэж эзэн нь юм шиг аашилдаг зангаа татах хэрэгтэй” гэсэн зөвлөгөө ч гэх юм уу, зандраа ч гэх юм уу үгийг хэлээд гаргасан байгаа юм.

Орон нутгийн сонгууль болох хугацаа дөхсөн энэ үед намаа ялалтад хүргэхийн тулд залуухан дарга зангарагтай загнаж, том жижиггүй хариуцлагатай ажил­ла­хыг сануулж эхэлсэн болол­той. МАН-ын дотоод зохион бай­гуулалт алдагдаж, гишүүд нь өөр өөрийн байр суурийг хамгаалж эхэл­сэн талаар зарим хэвлэлүүд бичиж байлаа. Түүнчлэн өөрсөд­дөө зориулан “ухардаг” хууль бат­луулахаар зарим намын ги­шүүд­тэй тохиролцоо хийсэн гэх хард­лага нийгэмд үүсч, Мон­го­лын төр ардын намгүйгээр амь­дарч болох эсэхийг шүүмжлэн хэ­лэлц­лээ. Намын дарга Ө.Энх­түвшин “УИХ-ын гишүүн С.Дэм­бэ­рэл, Ц.Цол­мон нар УИХ-ын дэ­гийн ту­хай хуулийн төслийг УИХ-ын даргад өргөн мэдүүлсэн. Хуу­лийн төсөлд УИХ-ын дарга то­милогдсоноос хойш 24 цагийн дотор бүлэг байгуулах бичгээ өргөн барина гэсэн заалтыг хасах тухай оруулсан юм. Ингэснээр пар­ламентад бүлэг байгуулах эрх­­гүй болоод байгаа МАН-ын 25 гишүүн бүлэгтэй болох эрх­зүйн орчих бүрдэнэ. Гишүүд пар­ламентыг гацаанаас гаргая, бү­хэл бүтэн 25 суудал авсан МАН өнөө­дөр бүлэггүй байна гэдэг нь Үндсэн хуулийг зөрчиж байна. Энэ бол хүч түрэмгийлсэн асуудал. Өөрсдийнхөө бодлыг тулгаж бай­на гэдгийг хөндлөнгөөс ха­раад ийм хуулийн төсөл өргөн барьж байгаа юм билээ. Манай на­мын зүгээс угаасаа УИХ дарга хууль бусаар сонгогдсон гэж үзэж бай­гаа учраас бид хуулийн тө­сөл өр­гөн барих нь утгагүй асуу­дал. МАН-ын бүлэг байгаа шүү” хэ­мээн өнөөх л улиг болсон бүл­гээ ярьж, хуулийн төслийн талаар байр сууриа илэрхийлсэн юм.

АН-ынхан фракциуд дэд сайд, агентлагийн дарга нарын томилгоонд анхаарлаа хандуулжээ

Хамтарсан засгаа байгуулж ажил­­даа шамдсан АН-ын дарга Н.Алтанхуяг намын ажилд ан­хаар­­лаа хандуулахгүй байгаа бо­­лолтой. Тэрбээр салбар ха­риуц­­сан сайдуудаа ажилд нь то­мил­­сон ч хэрэгжүүлэгч болон то­­­хируулагч агентлагийн дарга, Төрийн нарийн бичиг, дэд сай­дуудын албан тушаалд очих хү­мүүсээ фракциуд хоорондоо “далд­хан” ярилцаж байна. Эхийг нь эцээхгүй, тугалыг нь ту­раах­гүйгээр хуваарилах томил­гоо дэд сайд, агентлагийн дарга на­рын томилгоонд ч хийгдэх уч­раас дэд сайдуудыг өнгөрсөн бям­ба гарагийн Засгийн газ­рын хуралдаанаар хэлэлцэж амж­сан­­гүй. 13 сайд мөн тэр тоо­ны агент­лагийн даргын томил­гоо АН-ын фракциудын ирэх өд­рүү­дэд ярилцах сэдэв болоод бай­на. Түүнчлэн ирэх 11 дүгээр сард бо­ло­хоор товлогдоод бай­гаа Орон нутгийн сонгуульд Ард­чил­сан нам бэлтгэж эхэлсэн болол­той. Нийс­лэлд үнэмлэхүй ялалт бай­гуулсан, УИХ-д олонхийг бүр­дүү­лэх эрхийг авсан АН-ын хувьд одоо үлдсэн ганц даваа бол орон ну­таг юм. Орон нутгийн сонгуульд да­хин ялалт байгуулснаар тэд ши­нэчлэлт, өөрчлөлтийг шат ша­тандаа хийх боломж бүрдэх уч­раас энэ долоо хоногт намын удирд­лагууд аймгуудын АН-ын дарга нартайгаа уулзахаар бол­жээ. Зарим АН-ын аймгийн дарга нар аль хэдийн Улаанбаатар хо­тод ирчихээд Орон нутгийн сон­гуульд хэрхэн оролцох, ямар бү­тэц, зохион байгуулалттайгаар ажил­лах талаар хэлэлцэхээр тө­лөв­лөгөө гаргаж эхэлжээ.

Шударга ёс эвсэл “Улаан сарнай” жигүүрийг татан буулгаж, албан тушаалын томилгоо хийлээ

Өнгөрсөн долоо хоногт үйл явдлын халуун цэг болж, хамгийн их анхааралд өртсөн нам бол МАХН-МҮАН-ын шударга ёс эвсэл байсан юм. Сайдуудын томилгоог хий­сэн тэрбээр нам доторхи зо­хион байгуулалтыг өөрчилж на­рийн бичгийн дарга нараа то­милсон аж.  Засагт ажиллах дөр­вөн сайдын нэг байх МҮАН-ын дар­га М.Энхсайхан ямар учраас энэ албан тушаалаас татгалзсан, нам доторхи маргаанаас болж МАХН-тай нэгдэж өөрөө на­мын дарга болох гэж байна уу хэмээн М.Энхсайханыг эрэн сур­валжилсан гээд үйл явдал арвин­тай долоо хоногийг өнгөрүүллээ. Ши­нэчлэлийн засгийн газарт ажил­лах дөрвөн сайдын то­моохон эрх мэдэл нь МАХН-ын ги­шүү­дийн дунд албан тушаалын бужиг­нааныг ид өрнүүлж, Нийс­лэлийн түмтийн дарга н.Бям­ба­сүрэнгээр  толгойлуулсан “Улаан сарнай” нэртэй жигүүр бай­гуулагдах хүртэл хурцадсан юм.

Өнгөрөгч бямба гарагт МАХН-ын­хан бага чуулганаа хурал­дуулж “эсэргүү” нөхдөд арга хэм­жээ авчээ. Зарим гишүүдээ на­маасаа хөөхөөр болж, хатуухан зэм­лэл, маргаан мэтгэлцээнтэй ши­рүүхэн хурал болжээ. Тэд на­мын дарга Н.Энхбаярын эсрэг ярилц­лага өгч, намын нэр хүндэд халд­сан гэдэг үндэслэлээр Эдийн засагч Н.Дашзэвэгийг намаасаа хөөсөн аж. Н.Дашзэвэг намын даргаасаа уучлалт хүсч байгаагаа албан ёсоор мэдэгдсэн ч нэгэнт өнгөрсөн алдааг засч болохгүй хэмээн уурссан гишүүд нь түүний алдааг уучлахгүй гэдгээ хэлсэн учраас тэрбээр ИЗНН-д элсэх хүсэлтэй хүргүүлэхээр зэхэж буй бололтой. Улс төрд угсаа зал­гамжлах залуу жононгуудын нэгд тоо­цогдож дэд сайдын суудал горилж явсан Н.Энхбаярын хүү Э.Батшугар Гадаад харилцаа хариуцсан нарийн бичгийн дар­гаар томилогдлоо. Харин Тө­рийн байгуулалт хариуцсан на­рийн бичгээр УИХ-ын гишүүн З.Баян­сэ­лэнгэ, Говийн бүс хариуцсан на­рийн бичгийн даргаар Ч.Чимид­сү­рэн, Хэвлэл мэдээлэл хариуцсан нарийн бичгийн даргаар Б.Тулга, Засгийн газар хариуцсан нарийн бичгийн даргаар Н.Удвал нарыг тус тус томилсон байна.

МАХН-ын ерөнхий нарийн бичгийн дарга Н.Удвал Эрүүл мэндийн сайд бол­сон учир түүний оронд хэнийг то­милох вэ гэдэг асуудлыг да­раа­гийн хурлаар шийдвэрлэхээр бол­жээ. Энэ албан тушаалд Бай­галь орчны дэд сайд асан Г.Шийлэгдамба очих магадлалтай бай­гаа билээ. Түүнчлэн намын дар­гаа “монголд байхгүй өвчин” тус­сан хэмээн мэдэгдэж, албан ту­шаалд анхаарлаа хандуулаад намын даргаа мартаагүй гэдгээ харуулахаар “Шударга ёс” эвслийн удирлагууд ээлж дараалан мэ­дэгдэл хийв. Авдгаа аваад, айдгаа авд­­рандаа хийчихсэн эвслийн удирд­­лагуудын ирэх өдрүүдэд хийх ажил нь мөн л дэд сайд, агент­лагийн дарга нар болон на­мын дарга Н.Энхбаярыг аварч үл­дэх аян өрнүүлэх ажил байх нь ээ.

Б.Өнөртогтох