Хоймор нутгаас төрөн гарсан хоолойн цараа сайтай, мэргэжлийн дуучдын нэг бол Отгойн Баянмөнх. Тэрээр 2012 оны 8-р сарын 10-нд Боловсрол соёл шинжлэх ухааны яамны шагнал “Монгол улсын соёлын тэргүүний ажилтан” цол тэмдгээр энгэрээ мялаалгалаа. Түүний шагналыг төрийн ордонд УИХ-ын гишүүн С.Эрдэнэ гардуулж өгсөн байна.

Харин зарим хүн “Түүнд энэ шагнал хэтэрхий орой ирж байна” гэх нь дуулдсан. Учир нь тэрээр МУГЖ С.Жавхлан, Т.Баясгалан нарын ангийн анд, оюутан ахуй цагаасаа л тэдэнтэй мөр зэрэгцэн уран бүтээлээ олонд хүргэж ирсэн. Хэдийгээр тэдний адил тэр бүр олны анхааралд өртөөд байдаггүй ч түүний гаргасан бүтээлүүд мэргэжлийн хэмжээний, хоолойн цараа шаардсан “том” дуунууд байдаг нь ийн дүгнэхэд хүргэсэн биз ээ.

2003 онд СУИС-ийг дуурийн дуулаачийн мэргэжлээр төгссөн дуучин Отгойн Баянмөнхийн ард түмнийхээ сонорыг мялааж, сэтгэлд хүрсэн олон арван бүтээлүүдээс дурдвал дуучин Х.Саяжаргалтай хамтран дуулсан “Хайрын дуу”, “Анхны болзоо”,

“Буурлын нутаг”, МУГЖ С.Жавхлан, Бат-Эрдэнэ, дуучин Чулуунбаатар нартай хамтран дуулсан “Анд нєхдийн дуу” зэрэг уран бүтээлүүд нь тухайн цаг үед хит болж байлаа.

Түүнчлэн “Анд нєхдийн дуу”, “Адуун тэнгэртэй аав”, “Монгол бvсгvй”, “Сэтгэлийн гэрэл”, “Их аварга”, “Наран доторх наадам”, “Омогшил” зэрэг хоолойн бяд шаардсан олон бүтээлүүд түүний уран бүтээлчийн зиндааг тодорхойлдог.

МУСТА дуучин Отгойн Баянмөнх 2007 онд “Хөх Монголын хүчтэнүүд” нэртэй анхны цомгоо гаргаж, тухайн ондоо “Омогшил” нэртэй бие даасан тоглолтоо Монгол бөхийн өргөөнд тавьж байсан бол энэ оны 3-р сарын 17-нд “Бид мартаагүй” хоёр дахь бие даасан тоглолтоо хийсэн юм.

Харин түүний ур чадвар, мэргэжлийн уран бүтээлчийнх нь талаас МУГЖ Дуучин С.Жавхлан “Баянмөнх бол жинхэнэ чадалтай хоолойтой дуучин” хэмээн хэлж байсан бол СУИС-ийн багш нар түүнийг “Дууны үгийг маш цэвэрхэн хэлдэг, нааш нь гаргаж өгч дуулдаг, хоолойн цараа өргөнтэй дуучин” хэмээн тодорхойлдог билээ. Ийнхүү хоймор нутгийн авъяаслаг залуу уран бүтээлийн ажлаа мэргэжлийн байгууллагаараа үнэлүүллээ.