Өчигдөр орой нэлээд ширүүхэн, нэг хэсэг хүмүүсийн сэтгэл догдлуулсан нөгөө хэсэг хүмүүсийн сэтгэлийн эмтэлсэн сонин орой байлаа. Энд нэг хэсэг нь монгол ийм байна хэмээн гутарч байхад тэнд нэг хэсэг нь монгол ийм шүү дээ хэмээн бахадлаа. Монгол ёсоор эхлээд сайн мэдээг нь эхлээд дуулгая. Булганчууд анхдагчийн өлгий нутаг гэдгээ өчидөр дахин баталлаа. Үнэхээр монголын сор болсон “дайчид” энэ нутагт төрдөг юм байна.

Дөрвөн жилийн өмнө Бээжингийн олимпийн наадмаас монголчууд анх удаа олимпийн алтан медаль хүртэж, үндэстэн даяараа тэмдэглэж байсан цаг саяхан. Монголчуудын 44 жилийн турш хүлээсэн энэхүү алдрыг жүдо бөхийн -100 кг-ын жинд барилдсан Найдангийн Түвшинбаяр авч, монголчуудынхаа Хөдөлмөрийн баатар болж, хагаралтай байсан улс төрчдийг ч гар гараасаа барин нэгдэхэд хүрч байсан билээ. Харин өчигдөр энэхүү түүх дахин давтагдаж, дөрвөн жилийн өмнө нь дуурсаж байсан алдар дахин дуурсах дөхлөө. -100 кг-ийн жинд эх орноо төлөөлөн барилдсан Н.Түвшинбаяр жиндээ би номер 1 шүү гэдгээ баталж, олимпийн мөнгөн медаль хүртлээ.

Монголчууд түүний авсан медалийн алтын дайтай мөнгө медаль хэмээн хүлээн авч, “Түвшинбаяраа чи үнэхээр агуу бөх юмаа” хэмээн түүгээр бахдан суулаа. Үнэхээр ч олимпийн медалийг ихэрлүүлэн авсан бөх монголын түүхэнд байгаагүй билээ. Түүнийг ийнхүү бахдаж бас бахархахынхаа хажуугаар бөх хүний тэсвэр хатуужлыг амттайгаар мэдэрсэн гэхэд болно. Өөрийгөө ялан дийлж, хөл нь бэртсэн ч шүд зуун барилдан ялалт байгуулсаныхаа дараа дасгалжуулагчидаа үүрүүлээд явж байгааг нь харсан монголчууд өөрийн эрхгүй хамрын самсаа нь шархирсан биз ээ. Тиймээ монгол бөхийн орон, тэсвэртэй, тэвчээртэй, Чингисийн удам юм.

Хэдийгээр тэнд ийнхүү баярын нулимс асгаруулж байхад хэлмэгдэсийн тоо монголд харамсалтай нь нэмэгдэж байлаа. Дөрвөн жилийн өмнө нь Н.Түвшинбаярыг олимпийн алтан медаль авч байхад Монголын улсын Ерөнхийлөгч Н.Энхбаяр талбай дээр баяраа тэмдэглэн Халуун элгэн нутаг дуугаа халамцуухан дуулж байлаа. Харин дөрвөн жилийн дараа олимпийн аварга Н.Түвшинбаярыг олимпийн мөнгөн медаль авч байхад хэлмэгдүүлэлтэнд өртөж, талбайд биш, танхимд сууна өөрийн хувь заяагаа хэрхэн эргэхийг харж суулаа.

Монгол улсын 3 дахь Ерөнхийлөгч Н.Энхбаярт холбогдох шүүх хурал 3 өдрийн турш Сүхбаатар дүүргийн шүүхийн танхимд нээлттэйгээр болсон ч яг олимпийн медаль гардаж байх тэр торгон мөчид түүнд шүүх 4 жилийн хорих ялаар шийтгэлээ. Ийнхүү өчигдөр орой монголчуудын хувьд сайн, муу хоёр мэдээг зэрэг дуулгасан хоёр “Баяр” болох Н.Энхбаяр, Н.Түвшинбаяр нарын хувь заяа ийнхүү нэгэн мөчид шийдэгдлээ.