Танил талаараа дамжуулан хээл хахууль өгч эмчлэх эрх авсан 206 эмч эмнэлгийн ажилтан цагаан халаат өмсөн иргэдийн эрүүл энхийн манаанд зогсч байна. Магадгүй ил гарсан нь ийм боловч цаанаа өшөө олон ийм зөрчил бий гэвэл уншигч та итгэх үү? Эрүүл мэндийн сайд эмч болох гээд хаалга тогшиж байгаа хэнийг ч хамаагүй тушаал гарган иргэдийн амь насыг даатгаж байгаа нь өөрөө алдаа гэдгийг хяналтынхан болон ахмад эмч нар шүүмжилж байна. Тиймээс энэхүү хариуцлагагүй  үйлдэлдээ салбар толгойлсон яамныхан даруй шийдвэрлэх хэрэгтэй байгааг сануулах нь илүүц биз. Эм баригч, сувилагч 4027 хүн эрхийн лицензээ авахад 206 нь архивын материалд бүртгэлгүйгээр эмчлэх эрхийн лиценз авсан байх юм. Үүнд их эмч 65, бага эмч 46, эх баригч 12, эм зүйч 5, эм найруулагч 19, сувилагч 60 хүн тус тус архивын бүртгэлгүй, өөрөөр хэлбэл эмчлэх эрхийн лиценз шинээр авахдаа буюу сунгуулахдаа шууд арын хаалгаар авсан гэсэн үг юм.

Эдгээр чадваргүй, дадлага туршлагагүй хир нь эрүүл мэндийн манаанд зогсох сонирхолтой хүмүүст эмчлэх эрх олгосноос болж иргэд хор хохирол амсдаг байж болно. Авлига, хээл хахууль нь газар авч, асуудал үүсгэдэггүй ч энэ салбарт бага хэмжээний гар дагасан авлига байдгийг хэн хүнгүй мэднэ. Магадгүй ийм ашиг сонирхлын зөрчлөөр эрүүл мэндийн салбарт шургалах нь зөв үү буруу юу? Үүнийг бодох л хэрэгтэй.Хуурамч лицензтэй эдгээр хүмүүсийг цагдаагийн байгууллагаар шалгуулахад Гомбосүрэнгийн Мөнхсаруул, Самдангийн Рэгжиймаа, Цэдэндамбын Тунгалагтуул, Буянтогтохын Бадамзул нар нь эм зүйч, эм найруулагчийн мэргэжлээр ажиллах, эм барих эрхийн гэрчилгээг танил талаараа дамжуулан хууль бусаар авсан болох нь тогтоогдсон байна.

Үүнээс гадна орон нутгийн болон нийслэлийн эмнэлгүүдэд ажлын шаардлага тавих шаардлагатай, “Мон мэс” гэх мэт мэс заслын хувийн эмнэлгүүд эрүүл мэндийн наад захын шаардлага хангахгүй байгаа тул үйл ажиллагааг нь зогсоох хүртэл арга хэмжээ авах болсон тухай мэдээлж байна. Эмчлэх эрхийн лицензийг холбогдох газрын ажилтан тус бүр 300 мянган төгрөгний авлига  авч гаргадаг гэсэн аман мэдээлэл байгаа юм. Өвөрхангай аймагт л гэхэд ийм зөвшөөрөл авч хуурамч лицензтэй үйл ажиллагаа явуулж байгаа эмийн санчид олон байдаг. Хүн амын эрүүл энхийн төлөө тангараг өргөсөн байтлаа хүнлэг, үнэнч сэтгэлгүйгээр ийнхүү хуурамчаар  ажиллаж байгаа эмч нарт итгэх арга алга. Ийм эмч, сувилагчдаас болж хүний эрдэнэт амь хүртэл эрсдэж байгаа л байх. Эцэст нь хэнд хариуцлага тооцох ёстой вэ?
Ч.Сайханаа (www.wikimon.mn)