МАН-ын нам жил бүрийн сонгуулиар шинэ хүмүүсийг гаргаж ирж олонд танилцуулдаг. Өнгөрсөн 2008 оны сонгуулиар С.Бямбацогт, Ж.Энхбаяр, Ж.Сүхбаатар зэрэг 1970-аад оны залуусыг гаргаж ирсэн юм. Харин энэ удаагийн сонгуулиар ГХ-ны сайд Г.Тэнгэр, НХХ-ийн дэд сайд Н.Номтойбаяр, “НИК”-ийн дэд захирал О.Содбилэг, “Өндөр буянт холдинг” ХХК-ийн ерөнхий захирал Н.Төмөрхүү зэрэг 1980-аад оны залуусын төлөөллийг дэвшүүлж хурдан шинэчлэгдэж байгаагаа харуулсан.
Эдгээр залуусаас НХХ-ийн дэд сайд Н.Номтойбаяр, “НИК”-ийн дэд захирал О.Содбилэг, “Өндөр буянт холдинг” ХХК-ийн захирал Н.Төмөрхүү нар ялалт байгуулж залуусын дуу хоолойг парламентад хүргэх түүхэн үүргийг хүлээж, хариуцлагыг үүрэх ажилтай боллоо.

  Н.Номтойбаяр 1978 онд төрсөн. АНУ-ын Индианагийн их сургууль, АНУ-ын Ваппарайсо их сургууль, ХБНГУ-ын Техник эдийн засгийн дээд сургуулиудыг тус тус төгссөн Улстөр судлаач, инженер мэргэжилтэй. Бизнесийн удирдлагын магистр. Тагнуулын ерөнхий газарт ажилтан, “МАК” төслийн менежер, “МАК” ХХК-ийн Дэд ерөнхийлөгч, Нийгмийн Ардчилал Монголын Залуучуудын холбооны дэд Ерөнхийлөгч, 2012 оны гуравдугаар сараас Нийгмийн хамгаалал, хөдөлмөрийн дэд сайдаар томилогдон ажиллаж байсан. Монгол Ардын Намын Бага хурлын гишүүн. МАК-ийн өв залгамжлагч гэдгээр нь олон нийт андахгүй сайн танина. Энэ жил хөрөнгө орлогын мэдүүлэгтээ хоёр орон сууцтай, үйлдвэр үйлчилгээний нэг байгууламжтай, ланд круйзер, “Мерседэс бенз” гуравтай гэж мэдүүлж байсан. Түүний энэхүү мэдүүлэгийг мөсөн уулсын дөнгөж орой нь гэж олон нийт тодорхойлсон. Юутай ч түүнийг шинэ парламентын хамгийн баян залуу гэдэгийг хэн ч хүлээн зөвшөөрнө.

1980-аад оны залуусын гол төлөөллийн нэг бол О.Содбилэг. Түүнийг алдартай аавын нэртэй хүү гэдгийг хэн ч хэлээд өгнө.  Аав нь Монголын эдийн засгийн хүнд хэцүү байхад гол хөшүүрэг нь байсан “Эрдэнэт” үйлдвэрийг амжилттай удирдаж явсан. Тиймээс ард түмэнд хүндтэй. Харин тэрээр аав шигээ ард түмнийхээ хүндлэлийг дааж явж чадах боловуу гэсэн эргэлзээнд ирэх дөрвөн жилд хариулт өгнө. Түүнийг уг нь энэ жил дэд сайдаар томиологдох байх гэсэн таамаглал байсан. Гэвч тийм үйл явдал болоогүй. Уг нь намын дарга С.Батболд санал болгоход У.Хүрэлсүх татгалзсан гэсэн яриа байдаг. Яагаад гэдэгийг нь хэн ч сөхөж яриагүй. Гэвч дэд сайд горьдолгүй УИХ-ын гишүүн болоод гараад ирлээ. Тэрээр АНУ-ын Жоржтауны Их сургуулийг төгссөн. Олон улсын эдийн засагч мэргэжилтэй. Гадаад харилцааны яаманд мэргэжилтэн. Капитрон” банкинд хэлтсийн дарга, “НИК” ХХК-ийн дэд захирал, 2008 оноос “Петровис” ХХК-ийн дэд захирлаар ажиллаж байгаа юм. Түүний хөрөнгө орлогыг өнөөдөр хэн ч гэсэн бага гэж хэлэхгүй. Гэхдээ яг ямархуу хөрөнгө эзэмшдэгийг нь ч бас мэдэхгүй. Гэхдээ л алдарт Ш.Отгонбилэгийн ганц хүүг ихээхэн хөрөнгийн өв залгамжлагч гэдгийг багцаалж чадна. Ийм нэгэн гишүүн залуусын итгэл найдвар болж, ахмадуудыг айлгаж байна.

Ийнхүү МАН-ын залуус шинээр бүрэлдэх парламентад хөрөнгө мөнгөөрөө илүүрхэх хэмжээнд байна. Харин үзэл бодол, санаачилга, байр сууриараа тэргүүлж чадах болов уу гэдэгт ирэх жилүүдэд хариу өгнө.