“Сансар” кабелийн телевиз хэнээс мөнгө авчихсан юм бэ? Тэд сонгуулийн үеэр үнэндээ л чадварлаг хорлон сүйтгэх

ажиллагаа хийж байна. МАН-аас бусад нэр дэвшигчдийн захиалгат нэвтрүүлэг гарах үеэр дууг нь хааж, зүгээр л нэг дүрсийг 30 минут явуулсаар 10 гаруй хонож байна. Энэ төрлийн гомдлуудыг мөнгөө өгөөд гаргуулж байгаа юм болохоор нэр дэвшигчид хариуцсан телевиз рүү нь гаргаж, цацуулсан нэвтрүүлгийнхээ төлбөрийг буцааж авахаар бичиг илгээх болжээ.

Энэ үзэгдэл иргэдийн хурлынханд хүртэл нөлөөлж байгаа бөгөөд хамгийн сүүлд л гэхэд 1,5 сая төгрөгийн төлбөртэй цацуулсан СХД-ийн иргэдийн хурлын нэр дэвшигчийн нэвтрүүлгийг МАН-аас өрсөлдөж байгаа эрхэм “Сансар” КАТВ-ээр шууд хаалгаж, мөнгө нь салхинд хийсчээ.

Тус нэвтрүүлгийг гаргасан телевиз эфиртээ шалгалт хийхэд телевизийн биш кабелийн сувгийн буруу болж таарчээ. Учир нь, олон сувагт кабель болон бусад кабелиудаар зүгээр цацагдсан нэвтрүүлэг ганцхан “Сансар” КАТВ-ээр дуугүй нэвтэрсэн нь цаанаа л нэг учиртай. Сонгуулийн үеэр нэг удаа ч бус хэд хэдэн удаагийн үйлдлийг өдөр алгасалгүй гаргасан тус кабелийн телевизэд Харилцаа холбооны зохицуулах хороо л хариуцлага тооцож таарна. Наадмын дараа шаардлага хангаагүй кабелийн сувгуудын тусгай зөвшөөрлийг хүчингүй болгоно гэж байгаа. Тэгвэл шаардлага хангахгүй эфир цацдагийн дээр улс төрийн зорилго агуулсан хятад эзэнтэй “Сансар” КАТВ-г ч бас мартаж болохгүй мэт.
У.Сарнай (www.wikimon.mn)