МАН-аас УИХ-д нэр дэвшиж байгаа Нийгмийн хамгаалал, хөдөлмөрийн дэд сайд Н.Номтойбаярын тухай түүний бие хамгаалагч байсан Батзориг гэгч ярьсан бичлэг мэдээллийн хэрэгслүүдээр тарж шуугиан дэгдээгээд байгаа. “МАК” компанийг авлигал өгсөн, Н.Номтойбаярыг хүн зодсон, хүчирхийлэл үйлдсэн хэмээн тэрбээр зураг үзүүлэн нотолж байгаа юм. Батзориг гэх энэ хүн Н.Номтойбаяртай долоон жил хамт ажиллаад сүүлдээ ааш, авирыг нь тэсэхээ болиод ажлаасаа гарсан гэж тайлбарлаж байгаа юм. Тэрбээр Н.Номтойбаярыг МАН-ын нарийн бичгийн дарга Л.Оюун-Эрдэнэ болон хэд хэдэн хүмүүстэй хамт зуслангийн байшинд найрлахдаа хэрхсэн тухай баримт дэлгэжээ. Тэр даруйд Л.Оюун-Эрдэнэ энэ үйл явдлыг үгүйсгэн фэйсбүүк хуудасдаа мэдэгдэл хийгээд амжсан юм.
Харин энэ хэрэг өнөөдөр улам даамжирч Н.Номтойбаяр, Л.Оюун-Эрдэнэ нарын хүчирхийлсэн гэх эмэгтэй дээрх мэдээллийг нь үгүйсгэж, нэр төрд нь халдсан гэж мэдэгдэв. Мөн “маш нууц” баримтуудыг дэлгэсэн Н.Номтойбаярын бие хамгаалагч байсан Батзориг гэгчийг МАХН-ын дарга Н.Энхбаярын хүү Э.Батшугарын туслахаар ажиллаж байгаа гэж МАН-ын зүгээс мэдэгдэж байгаа юм. Одоогоор сонгуулийн дүйвээнээр чухам хэн нь үнэн ярьж байгаа нь тодорхойгүй байна.

Манай сайт Н.Номтойбаярын ноцтой баримтуудыг дэлгэсэн Батзориг, түүнийг нь няцаасан Л.Оюу-Эрдэнэ, нэр төрд нь халдсан гэж буй эмэгтэй Энхтуяа нарын мэдэгдлийг багцлан хүргэж байна.

Б.Баяр