Хэдхэн хоногийн дараа УИХ-ын ээлжит сонгууль болох гэж байгаа. Тиймээс улстөрчид ёстой л нэг хөл толгойгоо

олохгүй үймэлдэн сандралдаж байх шиг. Дөрвөн жил бараа сураг байхгүй бөгсөө харуулаад зугтаасан гишүүд ч ичих нүүрээ элгэндээ наасаар өнөөх сайхан, сайхан “үлгэр”-ээ ярьсаар тойрогтоо явж байх жишээтэй. Харин зарим нь өмнөх тойргоо сольж өөр тойрогт сайхан амьдрал “цэцэглүүлнэ” хэмээн бурж явна.  Өмнө нь сонгуулийн сурталчилгааны үеэр энд тэндгүй шоу тоглолт болж, ард иргэдэд мөнгө тарааж, худлаа амладаг байсан улстөрчид сонгуулийн хууль өөрчлөгдсөнөөр дээрх асуудлуудын аль аль нь хаалттай болсон. Тиймээс шоу тоглолтоор үзэгчдийн нүдийг хужирлаад өндөр үнэлгээ авдаг байсан тэд өөр арга хайж олжээ. Тэр нь юу гэхээр хэн нэгэн олны танил алдартаныг дагуулж, зүгээр л нүүрээр нь “реклам” хийх. Саяхан УИХ-ын гишүүн Ц.Батбаяр дуучин Д.Болдыг дагуулан тойргуудаараа явж, түүгээр өөрийгөө өөд уруугүй магтуулж, нэлээд рекламдаад авсан гэнэ лээ. Тэгвэл үүнтэй адил зарим жүжигчид, дуучид ч мөн л улстөрчдийн рекламанд өндөр үнээр явж байгаа ажээ. Харин бараг бүх л нэр дэвшигчдийн дунд од болж, эрэл суралд гаргаад байгаа хүн бол Асашёорюү Дагвадорж гэнэ. Сонгуульд нэр дэвшигчид мандатаа авсан өдрөөс эхлээд л түүнд мөнгө амласан, хамт явахыг хүссэн хүмүүс утас цохиж, амар заяаг нь үзүүлэхээ байжээ. Харин Их аварга маань ганц ч хүнд зөвшөөрөхгүй байгаа бөгөөд төрсөн ах Д.Сумъяабазарынхаа сурталчилгаанд ч ороогүй гэнэ лээ.
Г.Мандах www.uls.mn