Өнөөдөр Ерөнхийлөгч асан, МАХН-ын дарга Н.Энхбаярт холбогдох хэргийн шүүх хурал  Сүхбаатар дүүргийн шүүхэд  боллоо.
Шүүх хуралд яллагдагчид болох Н.Энхбаяр, До.Чулуунбаатар, Д.Мягмаржаргал нар хүрэлцэн ирсэн бөгөөд эмх замбараагүй байдал үүсч магадгүй хэмээн шүүхийн гадаа
60 гаруй цагдаа хамгаалалтанд гарчээ.

Мөн  Сүхбаатар дүүргийн гадаа МАХН-ын гишүүд дэмжигчид байгаа бөгөөд тэд   “Шүүх засаглал шударга байна гэдэгт итгэж байна”, “Ц.Элбэгдоржоо, чи хууль, шүүхийг ганцаараа өмчлөх эрхгүй” гэх зэрэг уриа лоозон барин зогсож байсан юм.

Шүүх хурлаас Н.Энхбаяр нарын өмгөөлөгч хөдөө яваа тул түүнд  холбогдох хэргийн шүүх хурлыг 6 сарын 21 хүртэл хойшлуулсан бөгөөд МАХН-ын дарга харин сонгууль дуустал хойшлуулахыг хүсэж байлаа.

Шүүх хурлын эхэнд Н.Энхбаяр : “УЕПГ, СЕХ тэргүүтэй хууль хяналтыг хэрэгжүүлэгч төрийн бүхий л машин Н.Энхбаяр гэдэг ганцхан хүний эсрэг чиглэсэн үйл ажиллагаа явуулж байна. Энэ бүхний эсрэг би ганцаараа тэмцээд, тэмцээд цаг хугацаа давчуу учраас хавтаст хэрэгтэйгээ танилцаж амжихгүй байна. Улсын яллагч Ё.Сагсай СЕХ-нд намайг битгий бүртгээч ээ гэсэн өөрийнхөө чиг үүрэгт хамааралгүй, хууль бус бичгийг Сүхбаатар дүүргийн шүүхэд хүргүүлсэн байсан. Тэрхүү хууль бус бичгийг нь Сүхбаатар дүүргийн шүүх хүлээн авч, СЕХ-нд хандсанаар миний бие МУ-ын Үндсэн хуульд заасан сонгогдох эрхээ зөрчүүлсэн.
Иймд СЕХ-ны хууль бус шийдвэрийг эсэргүүцэн Үндсэн хуулийн цэцэд хандах зэрэг ажлыг хийсээр байгаад хавтаст хэрэгтэй бүрэн танилцаж чадсангүй. Түүнчлэн миний өмгөөлөгч Б.Оюунбилэг УИХ-ын тавдугаар тойрогт нэр дэвшиж байгаа тул сонгогч түмэнтэйгээ уулзалт хийж, мөн хавтаст хэрэгтэй танилцаж амжаагүй. Улс нийтээрээ сонгуулийн уур амьгалд дарагдсан энэ цаг үед надад үүсгээд байгаа энэхүү улстөрчдийн захиалгат энэхүү хэргийг заавал улс төржүүлэн сонгуулийн өмнө хийх гээд байгаад ямар учир байна вэ? Хэрвээ та бүхэнд Ц.Элбэгдорж,Ц.Нямдорж, Д.Дорлигжав нар Н.Энхбаярыг ямарч хамаагүй аргаар заавал ялла гэсэн үүргийг өгөөгүй л юм бол шүүх хурлыг ингэж яаран сандран хийх шаардлага байгаа юм уу.
Миний хувьд шүүх хурлыг УИХ-ын сонгуулийг өнгөртөл буюу 2012-06-28-ны өдрийг өнгөрсний дараа хийгээч ээ гэсэн хүсэлтийг тавьж байна. Олон түмэн, дэлхий нийтийн анхааралд байгаа энэ хэргийг чин шударгаар явуулъя л гэж бодож байгаа бол сонгууль өнгөрсний дараа явуулаач ээ хэмээн хүсч байна.” хэмээн өгүүлсэн юм.

Э.Мягмар

sonin.mn