Өнөөдөр 15 цагаас МАХН-ын төв байранд МАХН-ын дарга Н.Энхбаяр сэтгүүлчидтэй дугуй ширээний уулзалт хийлээ.

Тэрээр 2012-04-13-ны өглөө баривчлагдсанаасаа хойш анх удаа сэтгүүлчдэд мэдээлэл өгч байгаа нь энэ юм. Н.Энхбаяр “Монголын ард түмнийг хэдэн үеэр нь тэжээх Оюутолгой, Таван толгойг төрийн эрхэнд гарсан хэдхэн хүн гадаадынхан хувааж өгөөд өөрсдөө хагартлаа баяжиж, ард түмнээ ядууруулсаар байна. Би энэхүү буруу гажгийг засах гэж, алдаа завхралыг арилгах гэж улс төрд дахин орох гэхээр эхлээд хууль хүчнийхнээр хууль бусаар баривчлуулж хориод ингээд дийлэхгүй болохоороо СЕХ гэдэг байгууллагаар хууль бус шийдвэр гаргуулан элдвээр хахин хавчиж эхэллээ. Энэ үйлдлээрээ МАН, АН надаас ямар их айж, ямар их болгоомжилж байгаагаа харууллаа. Мөн намайг баривчилсан, миний эрхэнд ноцтойгоор халдсан энэ бүх үйл явдлуудын ард МАН, АН байгаа гэдгээ нотлон харууллаа. Өчигдөр над дээр нэг эмээ ирээд тэтгэвэрийнхээ мөнгөнөөс өгч байна шүү гээд 30 мянган төгрөг өгсөн. Тэгээд за миний хүү чи энэ мөнгөөр эмчилгээ хийлгэж эрүүл болоорой, чи үхэж л болохгүй шүү. Энэ төрд чиний орон зай үгүйлэгдэж байна гэж хэлсэн. Би ард түмний дэмжлэг албан тушаалаас үнэтэй гэж хэлдэг. Намайг ард түмэн асар их дэмжиж байгаа. Ард түмний дэмжлэг их байгаа болохоор л МАН, АН надаас айгаад нэр дэвшүүлэхгүй, ялуулахгүй гэж үхэн хатан тэмцэлдэж байна. Хэрвээ би хэн ч биш, хэн нэгний дэмжлэгийг авч чадахааргүй байсан бол тэд тоохгүй зүгээр л хаячих байсан” гэв.

gonews.mn