Манай төрийн томчуудаас “Энержи ресурс”-т хэд хэдэн хүн нэлээдгүй оролцоотой байх аж. Тэгвэл тус компанид МАН-ын бүлгийн 8 Их хурлын гишүүн, АН-аас УИХ-ын дэд дарга Г.Батхүү нар хувьцаа эзэмшдэг аж. Мөн АН-аас Батж. Батбаяр их хэмжээний хувьцаа эзэмшиж байсан ч тэрхүү хувьцаагаа зарсан гэх мэдээлэл мэр сэр байдаг. ОХУ-д суугаа бүрэн эрхт Элчин сайд Д.Идэвхтэн мөн “Энержи ресурс”-ийн хувьцаатай болоод амжжээ. Тэр ч бүү хэл тэрбээр Эм-Си-Эс ХХК-ийн бариулсан орон сууцанд хувьцааны ашгийнхаа дагуу нүүж орсон гэдэг. Мөн УИХ-ын гишүүн Ц.Цэнгэлийн нэр томоохон хувьцаа эзэмшигчдийн дунд цохиж явна лээ.

Энэ талаарх холбогдох бүх материалууд УИХ-ын гишүүн Л.Гүндалайд хадгалагдаж байгаа бөгөөд тэрбээр үүнийг олон нийтэд мэдээлэхээр зэхэж байгаа гэсэн. Манай орны баялаг ихтэй газар болох стратегийн орд бүхий Тавантолгойд төрийн томчууд түрүүлээд үүрлэчихсэн эхнээсээ хувьцаа эзэмшиж, жижиг компани байгуулж, түүнийгээ зарж улам бүр хэтэвчээ зузаалсаар байгаа нь энэ мэт жишээнээс тодорхой харагдах биз ээ. Цаашлаад ЭБЭХ-ний сайд Д.Зоригт гэхчлэн одоогийн Их хурал, Засгийн газарт байгаа хүмүүс “Энержи ресурс”-тай хамааралтай байгааг харвал эх орон, улс үндэстний эрх ашиг гэхээсээ илүү хувийн эрх ашиг, санхүүгийн сонирхлоо урдаа барьж төрд зүтгэдэг бололтой юм.
Н.Дүүрэн (www.wikimon.mn)