Аливаа зүйл хөгжиж, дэвжиж тунгалагших ёстой атал энэ сонгуульд нэр дэвшигчдийг харахаар улам бүр дордсон мэт сэтгэгдэл төрж ирээдүйд итгэх итгэл алдрах юм. Тухайлбал экс ерөнхийлөгч Н.Энхбаярыг бүртгэж авах эсэх дээр сонгуулийн ерөнхий хороо түр түдгэлзүүлээд байна. Авлига хээл, хахуулийн хэрэгт сэжигтнээр татагдан шалгагдаж байгаа хэдий ч шүүхээр эцэслэн буруу эсэх нь тогтоогдоогүй байгаа учраас ийн түдгэлзүүлсэн бололтой. Ер нь УИХ сүүлийн үед гэмт хэрэгтнүүдийн ял завших, халдашгүй эрхээр халхавчлах “оромж” маягруугаа орж байна. Экс ерөнхийлөгчийн хувьд албан тушаал гэдэг аминаас чухал үйлс болоод байгааг даяар монголчууд харж байна.

Түүний авлига хээл хахууль авсан эсэх, гэмт хэрэгтэн мөн бишийг шүүх тогтооно. Гэхдээ эх орныхоо нэр хүндийг хилийн чанадад гутаахаар хийсэн, гүтгэсэн, булай бүхнийг нь хэн шүүх вэ? Хэн хүнгүй хуулийн дор амьдрах хуультай учраас хууль сөхье. Монгол Улсын Их хурлын Сонгуулийн тухай хуулийн 27.5.2-т “Нэр дэвшүүлэхдээ тухайн хүний Улсын Их Хурлын гишүүн байх мэдлэг, боловсрол, туршлага, ур чадвар, эх орон, ард түмний тусын тулд оюун ухаан, хүч хөдөлмөрөө зориулж, Монгол Улсын тусгаар тогтнол, бүрэн эрхт байдлыг хамгаалан бэхжүүлэх төгс эрмэлзлэл, шударга ёс, хууль дээдлэх ёс, УИХ-ын гишүүний ёс зүйн хэм хэмжээг сахин биелүүлэх чадварыг харгалзан үзнэ” гэжээ. Хууль хоёр тайлбартай байдаг. Болно гэдгийн нөгөө талд болохгүй, болохгүй гэдгийн нөгөө талд болно гэдэг оршин байдаг нь ойлгомжтой.

Монгол Улсын тусгаар тогтнол, бүрэн эрхт байдлыг хамгаалан бэхжүүлэх төгс эрмэлзлэл, эх орон ард түмний тусын тулд, шударга ёс, хууль дээдлэх ёс гэх мэт тодотголуудыг экс ерөнхийлөгч биелүүлж байгаа бил үү? Харин ч эх орон ард түмнийхээ эсрэг гүжир гүтгэлгийг харийн гүрнүүдэд цацаж, тэднээр улс орондоо шахалт үзүүлж, дарангуйлагч дэглэмтэй хойд солонгос мэтээр харагдуулж дэлхийд ганцаардуулах булай бодлого хийж байгааг юу гэж үзэх вэ?

Зөвхөн энэ заалтуудаар л экс ерөнхийлөгчийг нэр дэвшүүлэх нь бүү хэл ял асуух нь зүй. Үүнээс гадна дэлхий даяар цацаад байгаа нэгэн мэдээллийг нь үнэн зөв эсэхийг нь нягтлуулах нь зүйтэй байх.

Учир юун гэвээс Н.Энхбаярыг чармай шалдан хоригдлуудын дунд оруулж, хэрцгийлэн тамласан гэдгийг үнэн худал эсэхийг нь тогтоолгомоор байна. Хэрэвзээ ийм үйлдэл хийгдсэн бол шүүхийн шийдвэр гүйцэтгэлийнхэн хариуцлагаа хүлээх хэрэгтэй. Эс бөгөөс иргэн Н.Энхбаяр хариуцлага хүлээнэ. Харин гадаад орнуудад гутаагдсан монголын нэр хүндийг яаж үнэлэж, хэрхэн цагаатгах вэ?

Ямар ч байсан Н.Энхбаяр гэдэг хүнд сонгуульд нэр дэвших эрх зүйн чадамжгүйгээс гадна ёс суртахууны эрх алга. Чин үнэндээ шалдан хоригдлуудын дунд нүд хальтиран тарчлах нь бүү хэл таван өрөөтэйгээ танилцан эхнэр хүүхдээ дагуулж явсныг хоёр сая долоон зуун мянган монгол, таван сая дөрвөн зуун мянган нүдээрээ харсан. Тэр ч бүү хэл салаавч гарган чарлаж, хууль хяналтын байгууллагын албан хаагчдыг айлган дарамталж байгаа хүн төр түшилцэж чадах уу?

Энэ мэтчилэн бичигдсэн, бичигдээгүй аль ч хуулиараа Н.Энхбаяр гэдэг хүнд сонгуульд нэрээ дэвшүүлэх эрх зүйн бөгөөд ёс суртахууны боломж алгаа.