Н.Алтанхуягийг АН-ын дарга болох үе хамгийн их эсэргүүцэн, түүний нэрийг

унагаахаар хэвлэлээр ил, далд мессэж нисгэн, бусдыгаа турхирч байсан хүн бол З.Энхболд, С.Эрдэнэ нар.

Тэд Ц.Элбэгдоржийн хүмүүс гэдгийг бүгд мэднэ. Хамтарсан Засгийн газарт АН багтан ажиллаж байсан гурван жил гаруй хугацаанд Ц.Элбэгдорж, Н.Алтанхуяг нарын харилцаа сайжраагүй. АН-аас нэр дэвшин Ерөнхийлөгч болчихоод байхдаа ч Ц.Элбэгдорж, Н.Алтанхуягийг нүдний булангаар харсаар байсан юм. Гэвч саяхнаас тэдний харилцаанд өөрчлөлт орж, Н.Алтанхуяг үдэш бүр Ц.Элбэгдоржийн гэрт саатан, сэм шивнэлдэх болжээ. Намын даргын хувьд төдийлөн хүчтэй бус Н.Алтанхуягт чөтгөртэй гар бариад ч хамаагүй АН-ыг сонгуульд ялуулах хүсэл байгаа. Тэгэхгүй бол түүний карьер Тэргүүн шадар сайд хэмээх албаар эцэслэж, АН-ыг МАН-ын өвөрт хийсэн гэдэг нэрээр түүхэнд  үлдэхээс аргагүй. Тиймээс Ц.Элбэгдорж дээр өөрөө гүйгээд очсон гэдэг яриа байдаг. Тэднийг Ц.Элбэгдоржийн явуулгаар “Женко” Х.Баттулга уулзуулж, эв найрамдал тогтоох эхний оролдлого хийсэн гэсэн мэдээлэл ч бий.

Ийнхүү Н.Алтанхуяг, Ц.Элбэгдорж нар харилцан наймаа хийсэн нь саяхан биеллээ олов. Ерөнхийлөгч Ц.Элбэгдорж өөрийнхөө хүмүүст тойрог оногдуулж, АН-аас сонгуульд нэр дэвшүүлэхийг Н.Алтанхуягт тулгажээ. Хэрэв ингэвэл Н.Алтанхуягийн байр суурь ганхана гэдгийг Норовын хүү мэдэхийн сайнаар мэдэж байгаа. Тэгээд ч татгалзсан аж. Тэгэхэд нь Ц.Элбэгдорж  “Женко” Х.Баттулгын МоАХ-ны ээлжит их хурлаар цохилт өгч, АН дахь авилга, идээ бээрийг шахна хэмээн сүрдүүлсэн байдаг. Энэ хурлаас хойш Н.Алтанхуягийн чих зөөлөрч, хулхи нь хуга буусан аж. Энэ удаа тэдний хоорондын уулзалт амжилттай болсон гэдэг. Хэрэв Н.Алтанхуяг намын даргын хувьд “Алтангадас” –ыг ятган, Ц.Элбэгдоржийн хүмүүсийг олноор нь УИХ-ын сонгуульд нэр дэвшүүлбэл Ерөнхийлөгч ч хариуг нь даацтайхан барихаар тохирсон гэх.

Ерөнхийлөгчөөр овоглодог хүмүүс үнэд хүрэх шалтгаан нь АТГ тухайн үед МАН болон Н.Алтанхуягийн “Алтангадас” фракцыг давхар онилоод байсан явдал байв. Н.Алтанхуяг ийнхүү Ц.Элбэгдоржийн аманд багтан, үүнийхээ үр дүнд МАН-ыг буюу хүчтэй өрсөлдөгчөө АТГ-ын аманд хаяж өгөөд, “Алтангадас”-ыг авч үлдсэн гэсэн яриа байдаг. Үүнээс хойших бүх үйл явдал Ц.Элбэгдоржийн сценариар өрнөж, түүний арваад хүн АН-аас тойрог авав. Харин МАН-ийн Ц.Анандбазар, Э.Мөнх-Очир нараас эхлээд АТГ-т шалтагтай шалтаггүй шалгуулсан хүмүүсийн тоо нэмэгдэж, сонгуулийн халуун өдрүүдийг саарлаар будаж байна. Тэгэхээр Ц.Элбэгдорж МАХН-ын дарга Н.Энхбаярыг АТГ-аар баривчлуулахдаа АН буюу төрөлх намынхныгаа давхар сүрдүүлсэн бололтой. АН-ын асуудалтай нөхөд ч айж эмээсэндээ тойргоо суллан Ерөнхийлөгчийн зөвлөхүүдэд найр тавьсан сурагтай.

Ерөнхийлөгчийн зөвлөх М.Батчимэг Орхон аймагт нэр дэвшиж, Ц.Элбэгдоржоор хөтлүүлэн улс төрд орж ирсэн Ц.Оюунгэрэл Хөвсгөл аймагт өрсөлдөхөөр мандатаа авлаа. Мөн Ц.Элбэгдоржтой ил, далд холбоотой явсаар, хамгийн сүүлд нь 2008 оны долдугаар сарын 1-ний үеэр хамтдаа хөтлөлцөн талбай дээр жагссан Ж.Батзандан Баянзүрх дүүргийг ногоон гэрлээр халаасласан. Сонгинохайрхан дүүрэгт Ерөнхийлөгчийн зөвлөх Л.Эрхэмбаяр, мөн л Ц.Элбэгдоржийн халаасны хүн гэгддэг О.Магнай нар нэр дэвшиж буй.

Ц.Элбэгдоржийн зөвлөх Ч.Сосормаа АН-ын туршлагатай олон устөрчийн урд гишгэн “пропорционалын” 28-д дээгүүр багтлаа. П.Цагаан мөн адил энд тоосоо өргөж байгаа.

Энэ бүхнээс харахад Ц.Элбэгдорж Н.Алтанхуягаас санаснаа салгав бололтой. Их улс төрд мөн л Ц.Элбэгдоржоор овоглон хөл тавьж, сэтгүүлч байхдаа түүний гар хөл болж явсан МҮОНТВ-ийн захирал Ц.Оюундарь Говь-Алтайд өрсөлдөх нь тодорхой боллоо. Сүүлийн үед “Миний Ерөнхийлөгч” гэж үнсэж тэврэх нь холгүй нялуурах болсон Э.Бат-Үүл НИТХ-ийн сонгуульд АН-ыг удирдан орохоор ханцуй шамлалаа. Үүнээс үзэхэд Ц.Элбэгдорж АН-ын бүх шатанд хүмүүсээ суурьшуулж чаджээ. Н.Алтанхуяг ганц эвгүй гишгэхэд л унахад бэлэн болж, ойчих нүхээ өөрөө ухсан явдал болов. Ц.Элбэгдоржийн АН-д авчирсан энэ дарамт нийгэмд мэдрэгдэж байна. Э.Бат-Үүл хууль зөрчиж, УИХ-ын сонгуульд өрсөлдөнө хэмээн дуугаа чангаруулж байна. Багахан дарангуйлагч зан түүнээс харагдаж эхлэх нь тэр. МҮОНТВ-ийн Ц.Оюундарь мэдээллийн хамгийн том хэрэгслийг удирдаж байгаа хэрнээ энэ албаа өгөлгүйгээр УИХ-ын сонгуульд зэвсэг болон ашиглахаар зүтгэж байна.

Эсвэл Ц.Элбэгдоржийн хүмүүст хууль үйлчлэхээ больчихсон юм болов уу? Ядаж өрсөлдөгчдөөсөө ичих нүүр тэдэнд байхгүй бололтой.

Ц.Цацрал

bolod.mn