Өдрийн цагаар өөрийгөө хянах чадваргүй болтлоо бор дарс хэрэглэж, гурван согтуу хүүхэнтэй дарвиж яваад 10-хан настай хүүгийн амийг хөнөөсөн этгээд Цагдан хорих 461 дүгээр ангид хоригдож буй билээ. Сэжигтэн Ш.Алтанхуяг нь “Хишигтэн нүүдэлчин” компанийн гүйцэтгэх захирал бөгөөд өмнө нь цагдаагийн байгууллагад томоохон албан тушаал хашдаг байсан гэх эх сурвалжийн мэдээлэл бий.

Цагдан хорих 461 дүгээр ангид нэг сар гаруй хугацаанд хоригдож буй Ш.Алтанхуягийн бие муудсан тул өчигдөр цагдаагийн хоёр ажилтны хамт хорих ангиас түр хугацаагаар гарчээ. Энэ талаар Замын цагдаагийн газрын Олон нийттэй харилцах тасгийн байцаагч Б.Сүрэнжаваас тодруулахад, “Сэжигтэн Ш.Алтанхуягийг өчигдөр Цагдан хорих 461 дүгээр ангиас эрүүл мэндийн шалтгааны улмаас түр хугацаагаар гаргасан. Үзлэг, шинжилгээ хийлгэх шаардлага гарсан байна. Одоо бол хорих 461 дүгээр ангид саатуулагдаж байгаа. Хэвлэл, мэдээллийн хэрэгслээр түүнийг сулласан гэх ташаа мэдээлэл гарч байна.  Ш.Алтанхуягийн хэрэг одоогоор мөрдөн байцаах шатанд байгаа. Тиймээс өөр мэдээлэл өгөх боломжгүй” гэв.

Хэргийг сануулахад, Ш.Алтанхуяг нь нийслэлийн Баянгол дүүргийн VI хороо, 25 дугаар эмийн сангийн урд замд өнгөрсөн дөрөвдүгээр сарын 23-нд согтуугаар тээврийн хэрэгсэл жолоодож яваад гарцаар зам хөндлөн гарч явсан 10 настай хүүхдийг дайрч, амь насыг нь хөнөөсөн юм. УНИ 09-66 улсын дугаартай “Toyota Land Cruiser” маркийн автомашин хөлөглөж явсан тэр хүүхдийг дайраад, 15 метр орчим зайд чирсэн нь Замын хөдөлгөөний удирдлагын төвийн хяналтын камерт бичигдэж үлдсэн юм. Тэрбээр “Хишигтэн нүүдэлчин” гэх “Мон дулаан трейд” компанийн охин компанийн гүйцэтгэх захирлаар ажилладаг бөгөөд осол гаргах үедээ 70 хувийн согтолттой, өөрийгөө хянах чадвараа алдсан байсан нь тогтоогдсон билээ.

Түүний гэм буруутай нь шүүхээр тогтоогдвол Эрүүгийн хуулийн  215.3-т зааснаар тээврийн хэрэгсэл жолоодох эрхийг нь дөрвөн жил хүртэл хугацаагаар хасч, хөдөлмөрийн хөлсний доод хэмжээг 151-250 дахин нэмэгдүүлсэнтэй тэнцэх хэмжээний төгрөгөөр торгох, эсхүл 3-5 жил хүртэлх хугацаагаар хорих ял оноох хуультай юм.