Өчигдөр улс төрийн намууд хонон өнжин, дотроо олон жижиг драм өрнөсөн нэр дэвшүүлэх ажлаа дуусгав бололтой. Би өөрөө Найрамдлын районы буюу Сансарын хүүхэд, одоо Баянгол дүүргийн иргэн. Тэгээд Баянгол дүүрэгт нэр дэвшигчдээ харлаа. Хоёр том намаас дүүргийн хуучин, шинэ дарга нар өрсөлдөхөөр болж. За, тэр С.Эрдэнээг дүүрэгтээ ямар ажил хийж байсныг мэдэхгүй юм. Би 4-р хороололд нүүж ирээд таван жил л болж байгаа болохоор. Харин өнөөгийн засаг дарга, хатагтай Л.Амгалангийн ажлаа хэрхэн хийсэн тухай цөөхөн хэдэн үг тэрлэхээр шийдсэн юм.

Модны хоёрын зам явсаар шинэ гэмтэл хүрдэг дээ. Манайх тэр зам дагуу байдаг юм. Би өөрөө унаа тэрэггүй, гэхдээ автобусанд сууж мөнгө хураагчийн хүүхэд хөгшдөд уураа гаргахыг харах дургүй учир мөнгөтэй бол таксинд суудаг, үгүй бол алхчихдаг тийм л хүн.

Өглөө эрт гараад ажил руугаа алхах зуур хичээл, сургуульдаа яарах хүүхэд багачуул их таарна. Гэхдээ манай тэр хавийн хүүхдүүд их “зоригтой” машин замаар л алхана шүү дээ. Яагаад гэвэл замын хоёр талаар явган хүний зам байхгүй. Тэр чигээрээ овгор товгор, энхэл донхол шороо. Машин дөхөхөөр “явган хүнд зориулсан” нөгөө хотгор, гүдгэр шороо луугаа түр гараад л эргээд машин зам руугаа. Уг нь машин замаа тавьсан бол дараа нь явган хүний замаа хийдэг баймаар. Тэр явган хүний замаар алхах монгол хүмүүс биш, гадаадын төмрийн “хог” машинууд нь илүү хэрэгтэй бололтой, манай төр, засгийнханд.

Модны 2-ын болон 25-р эмийн сангийн огтлолцол уулзвараас шинэ гэмтэл хүртэл замын хоёр талаар явган хүний зам огт байхгүй. Модны 2 ч бараг байхгүй гэхэд болно доо… Энд тэндээ хаа нэг явган хүний замын хэлтэрхийтэй. Өргөөгөөс уруудахад Хөгжил хотхоны зүүн талд овоолсон шороо, ухсан нүх… Л.Амгалан авхай тэр хавиар ер нь явж үзсэн болов уу? Замаа олохгүй бол газарчлаад үзүүлэхэд бэлэн байна. Гэхдээ ажилдаа өмсдөг ганган шаахай хэрэггүй, сайхан шороон өнгөтэй, саарал пүүзтэй байхгүй бол ч хэцүү дээ.

Уг нь өмнөх ажлаа сайн хийхээр, дарга даамлууд нь мундаг ажилсаг, санал санаачлагатайг нь магтаад тушаал ахиулдаг баймаар. Гэтэл энэ МАН тэгдэггүй бололтой.

Тэр том намд мундаг залуус уг нь олон л баймаар. Нэг бол нөгөө жендерийн асуудал мань хатагтайд ийм том боломж олгов бололтой. Д.Оюунхорол хатагтай их л баяртайгаар “Манай нам эмэгтэйчүүдээ их дэмжлээ” гэж байна лээ. Ийм ажлаа хийдэггүй хүмүүсийг жендер гэсэн нэр томъёоллын ачаар дэвшүүлдэг, дэмждэг нь буруу билээ, уг нь.  Тооноос чанар нь гэдэг байх аа.

Эмэгтэйчүүд эрчүүдийг бодоход мэдрэмжтэй, хүний төлөө, нийгмийн төлөө их юм хийнэ гэж ярьдаг. Явган хүндээ сэтгэл гаргах хүсэлгүй, сэтгэлгүй хүн тэр дээр очиж суугаад юу хийх юм бол?

Өчигдөр хатагтай Д.Оюунхоролыг “Манай нам …” гээд баяртайгаар ярьж байхад Эх нялхаст хорин хэдэн сая төгрөгийн үнэтэй хүүхдийн инкубатор өгч байгаа үйл явдлыг ганц нэг телевиз цахас дурдаад өнгөрсөн. Сайн дурын үндсэн дээр, байгууллага, хувь хүмүүсээс хандив цуглуулж авч өглөө гээд нэг бүсгүй ярьж байсан. Газар, тэнгэр шиг ялгаатай сонсогдсон юм шүү, тэр мэдээ. Ийм л сайхан сэтгэлтэй бүсгүйг жендерээр дэвшүүлсэн бол гэж бодогдоод. Нэг нь төсвийн хөрөнгөөр юу хийгээд байгаа нь мэдэгддэггүй, нөгөөх нь хүний хүүхдийн төлөө хандив гуйгаад багаж төхөөрөмж авч өгдөг байна шүү дээ, цаана чинь.

Миний хувьд өчигдөр орой мэдээ харж суугаад сонголтоо бараг л хийчихлээ… Биднийг явган хүний замтай болгоод өгөөч, Л.Амгалан гуай?!
Н.Дэлгэр (www.wikimon.mn)