“Их Монголын алтан одод-2” сагсан бөмбөгийн нөхөрсөг шоу тоглолтод өчигдөр орой бөхийн өргөөнд боллоо. Тус тоглолтод оролцох тамирчид улаан хивсэн дээгүүр алхаж, хөгжөөн дэмжигчидтэйгээ гар барин мэндчилсэн юм. Салбар, салбараасаа сагсны талбайд шилдэг хэмээн шалгарсан урлаг, спорт, улс төрийн одод энэ үдэш нэгэн танхимд цуглаж, ширэн бөмбөгөөр тоглох ур авьяасаа гайхуулсан. Хэдхэн хоногийн өмнө өндөрлөсөн мэргэжлийн сүмогийн энэ сарын башёд зодоглоод ирсэн хүчтэнүүд “Манай сүмочид анхны тэмцээний аварга. Дахин хожил авахын тулд мэрийх болно. Бидний нэг дутагдалтай тал нь бэлтгэл ерөөсөө хийгээгүй байгаа” хэмээн ярьж байсан. Сумочдын багт Кёкүтэнхо Н.Цэвэгням, Харумафүжи Д.Бямбадорж Хакухо М.Даваажаргал, Какурюү М.Ананд, Рюүо Э.Санчирболд, Кёкүшюхо Т.Эрдэнэбаатар, Токитэнкү А.Хүчитбаатар, Асасекүрюү Дашням нар байсан. Харин долоон жилийн өмнөх тэмцээнд ялагдсан үндэсний бөхийн багийнхан “Бидний бэлтгэл тун сайн байгаа. Анхны жил хожигдож байсан бид энэ жил түрүүлэх л зорилго тавиад байгаа. Түрүүлнэ гэдэгтээ итгэлтэй байгаа” хэмээн ярьж байсан. Монгол Улсын гавьяат тамирчин Ц.Шаравжамц дасгалжуулсан үндэсний бөхийн багт даян аварга Г.Өсөхбаяр, гарьд Ж.Бат-Эрдэнэ, гарьд Н.Ганбаатар, гарьд М.Баяржавхлан, арслан Х.Мөнхбаатар, арслан Д.Ганхуяг, аварга С.Мөнхбат, заан Д.Рагчаа нар тоглосон. Тун өрсөлдөөнтэй, ширүүхэн тоглолтын дараа үндэсний бөхчүүд амласандаа хүрч, илт давуугаар буюу 33:18 харьцаатайгаар ялалт байгуулсан юм.

Гэрэл зургийг А.Ариука