Сангийн сайд Д.Хаянхярваа дарханчуудад нэгэнт нэр нүүргүй болсон хүн. АТГ-т шалгагдаж, аймгийн Засаг дарга байх үеэсээ л асуудал дэгдээж явсан тэрбээр өдгөө Сангийн сайдын суудалд тухлаж яваа сүйхээтэй эр. Хаян сайд харин Монголын ард түмнийг дарханчуудын нэгэн адил хууртахдаа амархан гэж ойлгосон бололтой. Эх орны хишгийг ахмад настан, хөгжлийн бэрхшээлтэй иргэд, хүүхдэд өгөх тухай асуудлын гол хэргийн эзэн болсон тэрбээр долоон хоног эхлэх бүрт л хэвлэлийн хурал зарлаж 1 сая төгрөгийн эхлэл 330 мянгыг энэ 7 хоногт өгч эхэлнэ хэмээн нэг сар гаруйн хугацаанд иргэдийг хуурч байна. Түүний хэлснээр бол, ирэх 7 хоногт 330 мянгыг энэ сарынхтай нийлүүлэн 660 болгож гарцаагүй өгөх гэнэ.

Гэтэл  уулын баяжуулах “Эрдэнэт” үйлдвэр болон “Эрдэнэс Тавантолгой” ХК-ийн ноогдол ашиг Сангийн яаманд шилжиж, энэхүү мөнгөнөөс Хүний хөгжил сан руу дахин 334 тэрбум төгрөг шилжсэний дараа Сангийн яам Хөдөлмөр халамж үйлчилгээний газар руу, Хөдөлмөр халамж үйлчилгээний газар Капитал, Хадгаламж банк руу гэсэн нийт дөрвөн дамжлага хийгдэх юм. Банк хоорондын гүйлгээ Төрийн сангаас бол 24 цагийн дараа хийгддэг. Өнөөдөр энэ мөнгийг шилжүүллээ гэж бодоход ирэх долоон хоногоос иргэдийн 660 мянгыг өгөх бололцоо бүрдэх л байх.

Харамсалтай нь, 660 мянгыг өгнө гээд Сангийн сайд нь ярьчихсан байхад өдгөө эхний ээлжийн 334 тэрбум төгрөгний санхүүжилт ч хийгдэх нь тодорхойгүй байгаа юм. Засгийн газар, тэр дундаа Сангийн яамнаас үүдэлтэйгээр Хөдөлмөр халамж үйлчилгээний газрынхан өндөр настангууд болоод хөгжлийн бэрхшээлтэй иргэдээс үгний мууг сонсч байгаа аж. Тэгэхээр 334 тэрбум нь шийдэгдлээ гэж бодоход дахин 334 тэрбумыг хаанаасаа олж 660 мянгыг эхний ээлжинд тараахыг хэн ч мэдэхгүй. Харин настайчууд болон хөгжлийн бэрхшээлтэй иргэд, хүүхдүүд эх орны хишгээ авна гэж нүдээ чилтэл хүлээж байна.
У.Сарнай (www.wikimon.mn)