Нэг нь эс боловч нөгөө нь гэсэн марафоныг “Мон-Уран”-ы Б.Наранхүү эгчийнхээ хамтаар эхлүүлэв. Эгч, дүү хоёрын хэн нэг нь Дундговиос зайлшгүй төлөөлөл болон гарах ёстой гэсэн зорилгыг өмнөө тавьж, нэг нь биш юмаа гэхэд нөгөөх нь гэсэн уриалга дэвшүүлжээ.

“Мон-Уран”-ы Б.Наранхүүгийн эгч нь Б.Ургамалцэцэг гэгч эмэгтэй бий. Тэрээр АН-д олон жилийнхээ ажил амьдралыг зориулсан нэгэн бөгөөд тус намын хүний нөөцийн албаны дарга юм. Тиймдээ ч энэ удаагийн сонгуульд хүйсийн давуу байдал, квотоо ашиглаж төрөлх нутгаасаа нэр дэвшихээр болоод байгаа аж. Улс төрчийнхөө хувьд дүүгээсээ илүү нэр хүндтэй ч түүнийг нутгийн иргэд сонгох уу, үгүй юу гэдэг нь урьдчилан хийсэн судалгаагаар сайнгүй дүн гарснаас харж болох аж.

Харин Б.Наранхүү аймгийнхаа сүүлийн 2 жилийн наадмын зардлыг дааж, уяачдыг айрагдуулж, унаач хүүхдүүдийг хуушуурдуулснаа их зүйлд саначихсан нэр дэвшигч царай гаргаад явж байгаа гэнэ. Түүнд улс төрийн намууд “сарьсан багваахай” гэдэг нэр хайрлажээ. Учир нь, МАН-д хэдэн төгрөгний ч  хамаагүй хандив өргөөд Дундговьд нэр дэвших эрх авахаар хөөцөлдөж байсан бол эгчдээ эрхэлж мөн л АН-аас тус аймагт нэр дэвших эрх авах гэж зүтгэжээ. Гэвч эгч нь дүүгээ биш өөрийгөө зүтгүүлэхээр эрс шийдсэн гэсэн. Ийнхүү хоёр ч намд гологдсон Б.Наранхүү бие даан нэр дэвшигч гэсэн статусыг сонгож авсан байна. Хоёр мандаттай байсан тус аймгийн хувьд энэ удаагийн сонгуулиар нэг мандат авах юм.  Гэтэл нэг мандатын төлөө эгч, дүү хоёр нэг тойргоос үзэлцэнэ гэдэг нь хөндлөнгийн хүмүүст сонин санагдаж байгаа аж.
Х.Пэрэнлэй (www.wikimon.mn)