Саяхан Нийслэлийн прокурорын газрын орлогч Е.Сагсай МАХН-ын дарга Н.Энхбаярыг долоон сар шалгаж, шүүхэд

шилжүүлсэн хэмээн ил тод ярьсан юм. Үүн шиг олны танил нэгэн эрхэмийг АТГ-ынхан араас нь мөрдөн мөшгөж байгаа тухай мэдээлэл тарлаа. Энэ эрхэм бол Санжаагийн Баяр юм. Түүнд сануулга өгсөн эхний алхам нь АМГ-ын дарга асан Д.Батхуягийг “аавынд” аваачиж хорьсон явдал юм. Д.Батхуяг бол С.Баярыг ерөнхий сайд байх үед томилогдсон, түүний хамгийн итгэлтэй хүн юм. Бас алтан нутаг. Тиймээс л зарим нэгэн С.Баярт сануулга өгч эхэллээ хэмээх таамаглалыг дэвшүүлсэн байж болох юм. МАН-ын хамгийн нөлөө бүхий эрхэм С.Баярын хүнийг яагаад ажлаас нь чөлөөлсөн бэ гэдэг асуудал анхаарал татаж байна. Манай улсын “хамгийн ашигтай” гэгдэх агентлагийн даргын суудал олон хүний анхаарлыг татаж байжээ.

Д.Батхуяг даргыг хууль бусаар лиценз олгосон тухай хэл ам гарах болсон тул ерөнхий сайд С.Батболд чөлөөлөх гэж нэг бус удаа завдсан байна. С.Баяр энэ асуудалд тээг тавьсан учраас тэрбээр чөлөөлөх гэж яараагүй аж. Тэгэсхийгээд өнгөрчээ. Харин Д.Батхуягийг ажлаас нь заавал ч үгүй чөлөөлөх ёстой гэж улайран зүтгээд хэлсэндээ хүрсэн нэг хүн бий. Тэр бол ЗГХЭГ-ын дарга Ч.Хүрэлбаатар юм. Ч.Хүрэлбаатар сайдын хэвлэлийн хуудсанд үлдсэн нэгэн ярилцлагадаа “ЗГХЭГ-ын даргын хувьд нэг агентлагийн даргыг ажлаа тааруухан хийгээд байгаа учир хариуцлага тооцохоо мэдэгдэж,  ажлаа өгөх өргөдлөө өг гэж хэлсэн. Түүний дараагаас өдөр алгасахгүй миний тухай сөрөг мэдээллийг төлбөртэйгөөр хэвлэлүүдээр цацаж байна. Тэр нөхөр яасан ч их мөнгөтэй юм.  Би тэр агентлагийн даргаас өргөдлийг нь заавал авна гэдгийг танай сониноор дамжуулаад шулуухан хэлчихье” хэмээн дурдсан юм. Энэ бол Д.Батхуягт хаягласан үг гэж тухайн үед уншигдаж байсан. Уг үйл явдлаас болон С.Баяр, ЗГХЭГ-ын дарга Ч.Хүрэлбаатар хоёрын хоорондын харилцаа хөндийрчээ.

Д.Батхуяг нэгэнт ажлаас чөлөөлөгдсөн учир дараагийн албаа боджээ. Түүнийг С.Баяр Хөвсгөл аймагтаа нэр дэвшүүлэхээр бэлтгэж эхэлсэн байна. Нэр дэвшихэд ямар нэгэн албан тушаал хэрэгтэй байсан тул ерөнхий сайдын орон тооны бус зөвлөх болгожээ. Ингээд сонгуульд ялна гэсэн итгэл төгс ажиллаж байтал “аавынд” хийчихлээ. Түүнийг “Саус гоби сэндс” компанид хууль бусаар лиценз олгосон гэж шалгаж эхэлсэн юм. Уг лицензийг С.Баярын зааврын дагуу өгсөн гэсэн мэдээллүүд ч сүүлийн үед хэвлэлийн хуудаснаа үзэгдэх болсон нь нэгийг өгүүлж, нөгөөг сануулаад байгаа бололтой. Бас АТГ-ынхан Оюу толгойн хөрөнгө оруулалтын гэрээ, түүний ханган нийлүүлэгч “Моннис” группыг ч анхаарлынхаа төвд байлгаж, баримт бүрдүүлж эхэлсэн сурагтай. Энэ бүхний учиг С.Баярыг чиглэж мэдэх юм.

Өөр нэгэн эх сурвалжийн мэдээлж байгаагаар бол С.Баярыг сонгуулийн өмнө авлигалын хэргээр шалгаад эхэлбэл МАН-ын нэр хүнд унана, АН-д шинэ боломж гарч ирнэ. Ийм зорилгоор С.Баярыг сонирхож байгаа гэж асуудлын учгийг тайлах аж. Сүүлийн үед МАН-ын нэр бүхий улс төрчдийг АТГ-аас шалгаж, зарим аймгийн дарга нарыг яллаж эхэлснийг олон янзаар тайлбарлаж байгаа. Юутай ч гэсэн ерөнхий сайд асан С.Баярыг АТГ-ынхан сонирхож эхэлсэн бололтой. Харин үнэн, худал болоод ямар сонирхол зорилгоор гэдэг нь цаг хугацааны эрхээр тодорхой болох биз.

24tsag.mn