МАХН-ын дарга, экс Ерөнхийлөгч Н.Энхбаярыг дөрөвдүгээр сарын 12-ноос 13-нд шилжих шөнө цагдаагийнхан албадан баривчилсан. Энэ ажиллагаанд Эргүүл хамгаалалтын газар, Хан-Уул дүүргийн цагдаагийн хэлтсийн 300 албан хаагч, мөн ЦЕГ-ын тусгай албаны 15 ажилтан үүрэг гүйцэтгэсэн билээ.

Тэднийг эрх мэдлээ хэтрүүлсэн, үүрэг гүйцэтгэх ажиллагааны журам зөрчсөн хэмээн буруутгаж Н.Энхбаярын бие хамгаалагч С, өмгөөлөгч О.Баасанхүү нар УЕП-ын дэргэдэх Мөрдөн байцаах албанд гомдол гаргасан бол “Хүний эрхийн үндэсний комисс”-ч баривчлах явцад хүний эрхийг ноцтой зөрчсөн гэсэн дүгнэлтээ тус газарт ирүүлж, зохих арга хэмжээг авч, эргэн мэдэгдэхийг хүссэн байна.

Эдгээр гомдлын дагуу УЕП-ын дэргэдэх Мөрдөн байцаах албаныхан тусгай ажиллагаа явуулсан 15 албан хаагчийг шалгаж эхэлсэн бөгөөд тэднийг сэжигтнээр татах үндэслэлтэйг албаны эх сурвалж хэлж байна. Мөн тухайн газарт хэв журам сахиулсан Эргүүл хамгаалалтын газар болоод Хан-Уул дүүргийн цагдаагийн хэлтсийн удирдах ажилтнуудаас тайлбар авчээ.

МАХН-ын дарга Н.Энхбаярын өмгөөлөгч О.Баасанхүүгийн гомдлоор АТГ-ын ажилтнуудыг ч “хууль бус шийдвэрээр баривчлах гэж оролдсон, галт зэвсэг гаргаж танхайрсан” гэсэн үндэслэлээр шалгана гэдгийг ч албаны эх сурвалж хэллээ.

Тухайлбал, Дөрөвдүгээр сарын 12-ны өдрийн 19-21 цагийн хооронд АТГ-ын мөрдөн байцаагчид гэж өөрсдийгөө танилцуулсан хүмүүс ямар ч зөвшөөрлийн бичиггүйгээр Н.Энхбаярыг баривчлахыг оролдсон, энэ үеэрээ буу гарган танхайрсан,

-тухайн өдрийн 22 цагаас хойш Сүхбаатар дүүргийн шүүхийн шүүгчийн баривчлах захирамжийг албан ёсоор танилцуулсан. Энэ нь өмнө шүүхийн захирамжгүйгээр Н.Энхбаярыг хууль бусаар баривчлахыг завдсаныг гэрчилж байна.

-тусгай ажилтнуудыг терроризм буюу онц ноцтой гэмт хэргийг таслан зогсооход зохион байгуулалттайгаар оролцуулдаг. Харин шүүхийн захирамжаар баривчлах тохиолдолд тусгай ажилтнуудыг оролцуулах шаардлага байгаагүй.

-энэ удаагийн баривчилгаа хойшлуулшгүй ажиллагаа байсан эсэх, Н.Энхбаярын гэрт түрэмгийлэн орох үйл ажиллагаа мэргэжлийн удирдлагын хяналт дор явсан эсэх,

-Н.Энхбаярын сууж явсан автомашин хамгаалалтын объектод орно. Гэтэл шүүхийн захирамжгүйгээр бусдын эд хөрөнгөд халдаж, машиных нь цонхыг хагалж хохирол учруулсан. Эдгээр үйлдэл нь хууль зөрчсөн эсэх, цагдаа, тусгай албад, АТГ-ынхан эрх мэдлээ хэтрүүлсэн үү гэдгийг шалгаж тогтоох юм байна.
Н.Дагдан now.mn