МАН-ын бүлгийн хурлаар ямар асуудал яригдсныг сурвалжиллаа. Энэ удаагийн хурлаар УИХ-ын гишүүдийн бүрэн эрхэд халдсан эсэх , Хууль зүй дотоод хэргийн сайд Ц.Нямдоржийг огцруулах тухай гэсэн хоёр асуудлыг хэлэлцжээ. Ц.Нямдорж сайд миний тухай хэлэлцэх гэж байгаа бол “Би суухгүй” гээд хуралд орж ирээгүй гэнэ. Харин энэ удаагийн хуралд УИХ-ын гишүүн С.Баяр суужээ. Тэрбээр “УИХ-ын гишүүн Ч.Улаан, Р.Раш гишүүн рүү хатуу үг чулуудаж “ Сонгууль дөхөж байхад яацгаагаад байгаа юм,  санаа зовоогоод байх юм. Миний бие тааруу. Гуурс  сэтгүүлж байна. Өвгөн ах нь зовлогоо даахгүй болоод байна” хэмээн гоморхсон гэнэ.
Харин УИХ-ын гишүүн Д.Тэрбишдагвыг магтаж “Унаж яваад морио, ханилж яваад нөхрөө гэдэг. Нөхөрлөлдөө үнэнч хүн сайхан санагддаг. Би ТБД-т  Н.Энхбаярыг гэртээ  урьж зайдас  шарж  өгч байгаарай гэдэг байсан. Хэрэв  Монголд байсан бол Н.Энхбаярыг  баривчлах үед гэрт нь яваад очсон байх байлаа. Даанч байгаагүй л дээ” гэжээ.
УИХ-ын гишүүн Р.Раш, Ц.Даваасүрэн, Д.Тэрбишдагва нар намын даргадаа болон УИХ-ын даргад ширүүхэн үг хэлжээ. Хэтэрхий бөөрөнхий байна, хурдтай, зоримог ажиллах хэрэгтэй, нам үлбийлээ гэж шүүмжилсэн байна. УИХ-ын дарга Д.Дэмбэрэлийг аль аль талд нь тал алдахгүй гэсэн шиг бөөрөнхий хариулт өгдөг, баривчилгааны талаар юу ч мэдээгүй, унтаж байсан гэж хэлэхээс ичих хэрэгтэй гэжээ. Үүнд нь спикерт тунирхаж “Намайг унтаж байсан гэсэн үгийг заавал олон түмэнд зарлаад байх ямар шаардлагатай юм” хэмээн зандарчээ.
Ингээд МАН-ын бүлгийн хурлаар  Ц.Нямдоржийг огцруулах тухай асуудлыг ярилцаад “дэмжихгүй” гэж шийдцгээсэн гэнэ. УИХ-ын гишүүн С.Баяр “Юм л болохоор  Ц.Нямдоржийг бид урьдаа барьдаг. АН-ынхантай үзэлцдэг ганц хүн нь шүү. Ийм хүнийгээ боорлож өөрсдөө огцруулна гэцгээж  болохгүй” хэмээн өмөөрсөн байна.
Х.Цэлмэг
Эх сурвалж:
www.ulstur.mn