Экс ерөнхийлөгч Н.Энхбаярыг АТГ-аас баривчилсан үйл явдлын мэдээлэл дотоодод төдийгүй гадаадад эрчимтэй мэдээлэгджээ. Ингээд гадны улс орнуудын хэвлэлээр ямар утгатай зүйл мэдээлэгдэж буйг уламжлая. …Монгол Улсын гурав дахь ерөнхийлөгч, МАХН-ын дарга Н. Энхбаярыг энэ сарын 13-ны өглөөний 06.00 цагийн орчимд гэрээс нь баривчилсан нь Монголын нийгэмд сенсаци дэгдээгээд байна. Тус улсын авилгалын эсрэг бие даасан агентлагийн тусгай мэдээгээр пүрэв гаригийн шөнө Энхбаярын машиныг зогсоон, түүнийг баривчлахыг оролджээ. Гэвч тэрбээр бие хамгаалагчдаараа хамгаалуулан саатуулсан газраас ойролцоо байх гэр лүүгээ зугтсан ажээ. АТГ-ын мэдэгдэж байгаагаар түүнийг ерөнхийлөгч байх хугацаандаа эрх мэдлээ ашиглан төрийн өмчийн зочид буудлын обьект болон телевизийг хувьдаа авсан гэсэн хэргээр эрүү үүсгээд байгаа юм байна. Түүнийг урд өдрийн оройн 20.00 цагийн орчим гэрлүүгээ явж байхад нь саатуулах гэсэн боловч түүний бие хамгаалагч болон намын гишүүн дэмжигчид нь хамгаалж баривчилгаа бүтэлгүйтсэн ажээ. Цагдаа нар түүнийг баривчлах гэхэд нь бие хамгаалагчид нь буу гаргаж ирсэн. Гэхдээ цагдаа нар бие хамгаалагчдыг аюулгүй болгож чадсан ба азаар энэ үед хүний амь эрсдээгүй гэнэ. Цагдаа хүчний байгууллагынхан нэмэлт хүч цуглуулж үүрээр баривчилжээ. Баривчлах ажиллагаанд 350 гаруй цагдаагийн албан хаагч оролцсон байна. Н.Энхбаярын намын гишүүд дэмжигчид түүний төрийн тусгай хамгаалалатад халдсан, хүний эрх, аюулгүй байдал, эрүүл мэндэд халдсан гэж цагдаа нарыг буруутгаад байгаа. Харин АТГ Н.Энхбаярыг дуудсан хугацаанд ирээгүй, мөрдөн байцаалт, шалгалтын явцыг удаа дараа тасалдуулсан учраас хүчээр баривчлахаас өөр арга байгаагүй гэж тайлбарласан байна. Н.Энхбаяр нь УИХ-ын дарга, Ерөнхий сайд, Ерөнхийлөгч гэсэн улс төрийн хамгийн дээд тушаалыг хашсан цорын ганц хүн бөгөөд авлигын хэргээр саатуулагдсан анхны дээд албан тушаалын хүн болж байна… Эх сурвалж http://www.chinadaily.com.cn/xinhua http://abcnews.go.com/International/wireStory/mongolian-president-seized-corruption-16129279#.T4fz0tkqukg http://news.findlaw.com/apnews/1ad16c65319240e8a01fabfe2a6939c6