Энэ бол сонгууль угтсан ээлжит цуурхал дуулиан биш шүү. Тун ойрын эх сурвалж нь ийн ам алдсан гэнэ.
“Мон уран”-ны захирал Б.Наранхүү гэх энэ эрхэм цаг үргэлж элдэв асуудалд нэр холбогдож байдаг. Газрын наймаагаар баяжсан, авилгач гэдгээс эхлээд бага насны охидыг болохгүй зүйлд уруу татсан гэх хүртэл хэл аманд өртөж тэр нь одоо хэр нь шийдэгдээгүй хууль хяналтын байгууллагаар шалгагдаж буй.

Товчхондоо  Б.Наранхүүтэй холбоотой элдэв дуулианыг эрэмбэлвэл сайнаас саар нь давамгайлж, нийгэмд буруу гарын аргаар хөлжиж, түүнийгээ баруун солгойгүй цацан баярхаж явдаг нэгэн гэсэн ойлголтыг төрүүлчихсэн. Гэсэн хэдий ч аливаад уужуу ухаанаар ханддаг нөгөө хэсэг нь түүнийг нутаг орныхоо төлөө хөрөнгө зарж буй “дотортой эр” хэмээн үнэлэх нь бий. Ийн сайн муу сүлэлдсэн Мон-Ураны босстой холбоотой нэгэн эмзэглэмээр мэдээлэл оны өмнө гарч байсныг уншигчид санаж буй биз. Түүнийг хорт хавдар гэсэн оноштойгоор Хятдад эмчлүүлж буй гэх мэдээллийг уншигч та бүхэн нэг бус нэлээд хэвлэлээс уншсан байх.

Гэвч ойрын нэгний ам алдснаар бол Б.Наранхүү хүндээр өвдсөн нь үнэн ч хорт хавдар тусаагүй гэнэ. Харин хүнсний зүйлээр дамжин хүндээр хордсон гэсэн оноштойгоор Бээжинг зорьж, яаралтай тусламжийг цаг алдалгүй авсны хүчинд амьд үлдсэн гэх юм билээ. Түүнчлэн сархадаар дамжсан хор элгийг нь гэмтээсэн учир урт хугацааны туршид эмчилгээ хийлгэж буй тухай зарим нэгэн нь ам алдсан удаатай гэнэ. Хэрвээ энэ бүхэн үнэн, Мон-Ураны захирлыг хордуулсан нь үнэн бол монголын улс төр, бизнесийн хүрээлэл ямар хэмжээнд хүртлээ бохирдсоныг харуулж байгаа юм. Өөдөөс нь харж байгаад үхэл илгээх үйл лав л Монгол ёсонд байхгүйсэн. Хэрвээ энэ үнэн бол монголд хөрөнгөтэй мөнгөтэй, хүчтэй нөлөөтэй байж лав болохгүй нь.