монголчуудыг           баян болгоно” хэмээн амлаж байсан. Энэ амлалтынхаа хүчинд өөрөө УИХ-д гараад зогсохгүй орон нутгийн сонгуулиар Хан-Уул дүүргийг бүхэлд нь “Бодь” группийн мэдэлд авсан байжээ. Учир нь группийн ажилтнууд тус дүүргийн ИТХ-д нэр дэвшиж, ялалт байгуулсан түүхтэй аж. Хан-Уулчууд ийнхүү “Бодь” группийн ажилтнуудад итгэх болсон шалтгаанаа зөвхөн “Баян Монгол” корпораци байгуулагдсан цагт бид баяжиж чадах нь”, “Яг Лу.Болд шиг болж чадах нь” хэмээн тайлбарласан.Гэвч өнөөдөр нөхцөл байдал өөр болжээ. Лу.Болд нь чинээлэг хэвээрээ , иргэд нь ядуугаараа байна. Нөхцөл байдал ингэж цаашид үргэлжилж байхад эрхэм гишүүний зүгээс нэг ч олигтой тайлбар хийгээгүй байна. Харин нэг тайлбар хийсэн нь “Хүний хөгжил сан”-г өөрийн “Баян Монгол” корпорацийн үйл хэрэгтэй адилтгаж, “Би амлалтаа биелүүллээ. Иргэн бүрт хувь, хишиг хүртээж, баялгийнхаа эзэн болох боломжийг Хүний хөгжил сангийн тухай хууль бүрдүүллээ. Өөрөөр хэлбэл, мөрөөдөл маань бодит зүйл боллоо” гэх тайлбар хийсэн. Учир нь 2008 оны сонгуулийн үеэр 21 мянган төгрөг бус харин бүхэл бүтэн 40 гаруй сая төгрөгийг амлаж байсан юм. Тэрээр дөрвөн жилийн өмнө ийн ярихдаа, “ Монгол айлыг эх орон шигээ хүчирхжүүлэхийн тулд “Баян Монгол” төслийг боловсрууллаа. Монгол хүний амьдралын чансаа улсынхаа тэнхээг дагаж, дэлхийд эхний гурваа байг гэхэд аравт багтах үүд хаалгыг “Баян Монгол” корпораци төсөл нээж байгаа юм. Ашигт малтмалаас олох цэвэр ашиг ойрын зургаан жилд 25 дахин өснө. Нэг хүнд ноогдох ДНБ ирэх найман жилд зургаа дахин нэмэгдэх бодит тооцоо гарсан байна. “Баян Монгол” корпораци бол Ардчилсан намын Эрдэнийн хувь хүртээх зорилтын үндсэн арга билээ. Энэ хөтөлбөр бол Монголд байгаа баялгийг монгол хүн бүрт хүртээх хөтөлбөр мөн. Энэ хөтөлбөр бол эзэнтэй юмыг эзэнд нь өгөх хөтөлбөр. Манай орны 50 гаруй ордод байгаа байгалийн баялгийг эдийн засгийн эргэлтэнд оруулж өнөөдрийн ханшаар үзэхэд 186 тэрбум ам. доллар болж байна. Нэг хувьцааг нь 100 ам. доллараар үнэлээд 2.6 сая хүндээ хуваагаад үзэхэд нэг хүнд 361 хувьцаа буюу 36,122 ам. доллар, хөрвүүлээд үзэхэд 40 орчим сая төгрөгийн хөрөнгө ноогдож байгаа юм” гэсэн түүний үг 2008 оны сонгуулийн сурталчилгааны үеэр телевизээр өдөр шөнөгүй цацагдаж байсныг санаж байгаа байх. Энэ мэт худлаа амлалт өгсөн Лу.Болдоос эхлүүлээд УИХ-д толгой дараалан суугаа эрхэмүүд байгаа ч сануулхад илүүдэхгүй биз ээ.