Хэргийн газарт. 2012.04.05-ны 10.57 цаг

-ЭХНЭР НЬ НӨХРӨӨСӨӨ САЛАХААР ШҮҮХЭД ӨРГӨДӨЛ ӨГЧИХСӨН БАЙЖЭЭ-

Баянзүрх дүүргийн IV хорооны нутаг, 15 дугаар хорооллын 12 дугаар байрны үүдэнд өчигдөр онц ноцтой хэрэг гарлаа. Гудамжинд залуу эмэгтэйг хутгалан хороосон гэх хэргийн газарт өчигдөр 10.30 цагт очиход тус байрны гуравдугаар орцны өмнөх замд эмэгтэй хүний цогцсыг цагдаагийн хамгаалалтад авсан байлаа. Талийгаач хар савхин хүрэм, жинсэн өмд өмсчээ. Дөрвөн цагдаа хэргийн газарт үзлэг хийж байлаа. Нүүрийг нь бүтээсэн эмэгтэйн өмссөн хувцас, байр байдлыг нь харахад талийгаач 30 эргэм насны болов уу гэмээр аж. Хэрэг бүртгэлт эхэлж байгаа учраас цагдаа нар мэдээлэл өгөх боломжгүй гэж байв. Бүр 12 дугаар байрны гуравдугаар орц руу ч хүн оруулахгүй байсан.

“НЭГ ЭРЭГТЭЙ ХУТГАЛЧИХААД ЗУГТСАН”

Тухайн үед хэргийн газарт байсан эмэгтэй бидэнд мэдээлэл өгсөн юм. Тэрбээр хүн амины хэргийн гэрч болохыг хүсээгүй учраас нэрийг нь нууцаллаа. Түүний ярьснаар 9.00 цагийн орчимд тус байрны үүдэнд эрэгтэй, эмэгтэй хоёр хүн явж байсан гэнэ. Тэд түр зогссоноо гэнэт эрэгтэй нь эмэгтэйгээ хэд, хэд хутгалчихаад зугтсан аж. Бүсгүй тэр дороо газарт унаж, их хэмжээний цус алджээ. Болсон явдлыг харсан иргэд цагдаад дуудлага өгчээ.

Хохирогч бүсгүй залуутай маргалдаж байгаа шинж байгаагүй гэдгийг гэрч онцолсон юм.

ЭХНЭРЭЭ ХӨНӨӨЧИХӨӨД ЗУГТАЖ ЯВАХДАА АМИА ХОРЛОХЫГ ЗАВДЖЭЭ

Эх сурвалжийн мэдээлснээр энэ хэрэг нь нөхөр нь эхнэрээ хөнөөсөн гэгдэж байна. Тэд 30 гаруй насны залуу гэр бүл гэнэ. Талийгаач бүсгүй 12 дугаар байрны ойролцоох гоо сайхны салонд ажилладаг байжээ. Тэд дэр нэгтгээд цөөнгүй жил болж байгаа, бага насны хүүхэдтэй гэнэ. Харин ойрноос таарамжгүй байсан ажээ. Үүнээс үүдсэн үү, эхнэр нь нөхрөөсөө салахаар шүүхэд өргөдөл өгчихсөн байж. Энэ дагуу шүүх хурал удахгүй болох гэж байжээ. Харин нөхөр нь эхнэрээсээ салахгүй гэснээс үүдэж хэрүүл үүссэн бололтой. Улмаар нөхөр нь эхнэрээ урдаас нь дөрөв, хойноос нь тав хутгалж хөнөөлөө.

Нөхөр нь эхнэрээ хөнөөчихөөд зугтаж явахдаа хэвлий рүүгээ хутгалж амиа хорлохыг завджээ. Түүнийг хэргийн газраас холгүй цус алдсан байдалтай байхад нь цагдаа нар олжээ. Хэвлийн хөндийдөө хутгалсан учраас бие нь маш хүнд, яаралтай мэс засалд орж байгаа гэдгийг эх сурвалж хэлсэн юм.

“ХЭРЭГ БҮРТГЭЛ ДӨНГӨЖ ЭХЭЛЖ БАЙНА”

Цагдаагийн ерөнхий газрын албаны эх сурвалжаас хэргийн талаар тодруулахад “Хохирогч, сэжигтэн хэн болох, гэр бүлийнх нь байдлыг тогтоохоор ажиллаж байна. Манайхан холбогдох зүйлүүдийг тодруулахаар хэд хэдэн тийшээ явсан. Хэрэг бүртгэл дөнгөж эхэлж байгаа учраас мэдээлэл өгөх боломжгүй” гэсэн юм.

Ц.ӨРНӨХ

Гэрэл зургуудыг Ц.МЯГМАРСҮРЭН

Хэргийн газарт шинжээч нар ирэхээс өмнө талийгаач эмэгтэйг орны цагаан даавуугаар бүтээсэн байлаа. 2012.04.05-ны 10.45 цаг

Талийгаач эмэгтэйг энэ байрны хажууд хөнөөсөн аж. 2012.04.05-ны 10.59 цаг

ӨДРИЙН СОНИН-МЭДЭЭ.МН