Дэгсхэн яривал өчигдөрхөн барилдаж явсан бөх өнөөдөр төрийн түшээгийн суудал дээр ханхалзаж байх нь ердийн явдал болжээ. Японы сүмод “Мэхний их дэлгүүр” гэгдэж алдаршсан Кёкүшюзан Д.Батбаяр зодог тайлаад ганц жил болов уу яав, УИХ-ын гишүүн болж торгон жолоогоо өргүүлсэн.

Монголын хөрөнгөтнүүд олон боловч зөвхөн Сэм авгын ногоон дойлуураар хэмжигдэх тэрбумтнуудын тоо 300 хол давжээ. Харин Япон, Монголд 22 компанитай Кёкүшюзан Д.Батбаяр гишүүн түүнд хүрч очих бололтой.

Яасан бэ гэвэл АН-ын дарга Н.Алтанхуягийн гараас хөтлүүлэн Ардчилсан намд элссэн мань сүмоч өөрийнхөө намын гишүүн болсон 805 залуусын өмнө гайхалтай нэгэн мэдэгдэл хийжээ. “Одоогийн олсон амжилт бүхэн минь миний хөлс хүчтэй холбоотой. Төсвөөс тэрбумтан төрдөг бол би хөлснөөсөө төрсөн тэрбумтан. Тэр тусмаа дэлхийд данстай тэрбумтан шүү” хэмээн мэдэгджээ. Ам халаад дэгсдүүлж бурчихав уу, аз нь шовойсон хувь заяагаараа бардаж томров уу өөрөө нэг тайлбарлах байлгүй дээ.
Ц.Баатар wikimon