Дуучин Л.Байзада өнгөрсөн намар аавынхаа нэрэмжит “Латиф” санг байгуулсан билээ. Урлагийн салбарт амжилт гаргаж байгаа залуусыг дэмжих, мөн олондоо хайрлагдсан ховорхон авьяасын эздийн тухай нэхэн дурсах гэх мэт сангийн хийхээр төлөвлөсөн олон ажлуудын жагсаалт хэдийнэ гарсан ажээ. Сангийн тэргүүн тэрээр одоо өөрөө дуулахаасаа илүү өрөөлийг “хоолыг” бэлтгэж өгдөг бас нэг ажилтай. Түүний хэд хэдэн дууг рок попын шинэ залуу дуучид дуулж олны хүртээл болгоод байгаа юм.

“Байзада ба түүний нөхөд” ид мандаж байхад тэрээр хамтлагийнхаа бүжигчин охинтой гэр бүл болж байсан ч харамсалтай төдөлгүй тусдаа амьдарцгаах болсон. Түүнээс хойш их олон жилийг гоонь эрийн амьдралаар өнгөрөөсөн дуучин залуу энэ луу жилд “зүлгэн дээр гэрээ бариад зүгээр л амьдрахаар” шийдсэн гэнэ шүү. Ямартаа ч түүний шийдвэрийг сонссон сониуч найз нар нь Байзадагийн дурлалт бүсгүйн эрэлд гарчээ.