“Хүмүүн фильм” уран бүтээлийн нэгдэл “Эр цэргийн баяр”-аар Монгол улсад ардын арми, зэвсэгт хүчний эхлэлийг атвьсан “Анхны долоо” хэмээн алдаршсан түүхэн долоон эрсийн тухай “Долоон бурхан харвадаггүй” УСК-г хийж, өнгөрсөн 18-ны өдөр орон даяар зэрэг нээж, олны хүртээл болгосон. Зураг авалт дууссан цагаас эхлэн реклам сурталчилгаагаар “бөмбөгдөж”, олны анхаарлыг татаад байсан энэхүү уран бүтээл нь дуу, дүрсний хувьд өндөр түвшинд хийгдсэн ч сонгууль угтсан сурталчилгааны нэг болсоныг үзэгчид шууд л шүүмжилж эхлэв. Учир нь МАН-ын уриа болсон “Иргэн баян бол улс баян”, “Эх орны хишиг бол иргэн хүний баялаг” зэрэг үгсийг гол дүрийн жүжигчид хэлж байсан нь түүхэн кино гэх утгыг алдагдуулж МАН-ын сонгуулийн сурталчилгааг уран сайхны аргаар хүмүүст хүргэж буй явдал болсон. харин уг киноны зохиолыг бичиж, ерөнхий продюссероор нь ажилласан яруу найрагч Ж.Мөнхбат хэлэхдээ “Энэ кино бол түүхэн уран бүтээл. Бид аль нэг намыг баримтлаагүй түүхийн үнэн мөнийг л харуулахыг зорьсон” хэмээсэн юм. Түүнчлэн тэрээр “Энэ кино бол маш өндөр өртөгтэй бүтсэн. Хөрөнгө мөнгөний хувьд маш олон хүний тусламж дэмжлэг авсан. Тиймээс киноны нээлтийн дараа жүжигчдийн хувцас хэрэглэл болон зэр зэвсэгийг дуудлага худалдаагаар оруулж үлдсэн өрөө дарна” хэмээн ярьж байсан. Гэвч түүний ярьсан зүйл МАН-ын захиалгаар хийгээгүй гэдгийг тодотгох гэсэн өнгөлөн далдлалт төдий зүйл байсан нь ойлгомжтой. Эс тэгвээс МАН-ын сурталчилгааг хийхийн тулд Ж.Мөнхбат хэдэн зуун саяын өрөнд орсон болж таарах нь.
Н.Уранхас www.uls.mn