Ардын уран зохиолч Б. Лхагвасүрэн “Монгол туургатны 100 эрхэм” нэвтрүүлгээр телевизийн дэлгэцнээ үзэгч түмэнтэйгээ уулзах болсон. Тэгвэл энэ нэвтрүүлгийг цаашид явуулах уу, үгүй юу гэдэг асуудал тулгараад өнөөдөр тус нэвтрүүлгийг зохион байгуулагч Соёл урлагийн хороо, “Hero entertainment” студи хамтран мэдээлэл хийсэн юм.

Редактор хөтлөгчөөр ажиллаж байгаа Б.Лхавасүрэн, П.Анужин нарын хөтлөн явуулдаг энэхүү нэвтрүүлэг сүүлийн үед олны өмнө шүүмжлэлд өртөх болсон. Гэхдээ энэ бол шүүмжлэл бус гүтгэлэг рүү хандсан асуудал болсныг тэд өнөөдөр тайлбарласан юм. Тодруулбал “Монгол туургатны 100 эрхэм” нэвтрүүлэг 10-30 сая төгрөгийн төлбөртэй, түүнчлэн сонгуулийн сурталчилгаа болсон, мөн нэвтрүүлэгч П. Анужин тус нэвтрүүлгийн найруулагч Баатартай амрагийн холбоотой, зэрэг олон олон гүтгэлгийн чанартай мэдээлэл явдагийг тэд үгүйсгэсэн. Б. Лхагвасүрэн хэлэхдээ “Үнэхээр бүдүүлэг энэ олон гүтгэлгээс болж бид өнөөдөр нэвтрүүлэгээ хийх үү үгүй дээрээ тулж байна. Бид энэ нэвтрүүлгийг яаж явуулах ёстой юм. Хүний тухай ярихаар сонгуулийн сурталчилгаа гэж гүтгэж байна. Хөтлөгчийн маань биеэ үнэлдэг гэж байна. Ийм олон бүдүүлэг гүтгэлэгт би бүдүүлгээр хариулна. Мөн намайг Анужингаас 100 сая төгрөг авч энэ нэврүүлэгийг хөтлөж байгаа гэсэн. Би энэ бүдүүлэг гүтгэлэгт чинь адилхан бүдүүлгээр “Битгий хуц” гэе” гэлээ. Ямар ч байсан Б.Лхагвасүрэн зохиолчийн хувьд өөрөө зохиол бичиж, нийтэлдэг, сэтгүүлчдийн адил л бичдэг хүний хувьд сэтгүүлчдийг шүүхэд дуудагдах үед нь дотроо өмөөрдөг, гэвч ийм сургаар, салхиар сонссоноос гүтгэдэг ямар ч гоо зүйгүй, хариуцлагагүй зүйл хийж байгаад нь эмзэглэж, бухимдаж байгаагаа ийнхүү илэрхийлсэн юм.

Уг нэвтрүүлэгт оролцож байсан эрхэмүүдээс мөнгө огт авч байгаагүй. Мөн Баатар эхнэртэйгээ энгийн сайхан амьдарч байгаа гэдгээ тайлбарласан. Энэ мэдээллийг хийснээрээ тэд юу гэж ярих нь хамаагүй, хамгийн гол нь үнэн мэдээллийг хүргэхийг сэтгүүлчдээс хүссэн.

Ингээд тэд цаашид нэвтрүүлгээ явуулсаар байна улам сайхан болгоно гэдгээ мэдээллийнхээ төгсгөлд хэлсэн юм.

Г.Туяа