Манай сонин нэг хүний гар дээр бөөн бөөнөөрөө төвлөрсөн ашигт малтмалын лицензийн тоог хуульчлах санаачилгыг Монгол Улсын Ерөнхийлөгч Ц.Элбэгдоржид уламжилж байгаа билээ. Бид энэ удаа “Дацан трейд” ХХК-ийн гүйцэтгэх захирал Д.Баян­бат гэгчийн талаар хүр­гэж байна.

Ашигт малтмалын хайгуул олборлолтын чиглэлээр үйл ажиллагаа явуулдаг “Дацан трейд” ХХК Монгол Улсын нутаг дэвсгэр дээр 52 лиценз эзэмшиж байжээ. Тус компанийн захирал Д.Баянбатын хувьд З.Номундарь, Д.Самбалайбат зэрэг лицензийн архаг най­маач­дыг бодвол харьцангуй сүүлд гарч ирсэн бололтой. Учир нь түүний нэр дээр бүрт­гэл­тэй лицензүүд 2000-2005 оны хооронд олгогдсон байдаг. Төдийлөн нэрд гарч бай­гаагүй ч ашигт малтмалын ли­цензийн бизнесээр нэ­лээд ашиг олсон “Дацан трейд” ХХК-ийн талаар нэгэн сонирхолтой баримт өгүү­лэхэд тус компанийн гүй­цэтгэх захирлаар Д.Баян­бат гэгч ажилладаг гэх боловч жинхэнэ эзэн нь хэн болох нь тодорхойгүй бай­даг аж. Харин 2008 онд “Да­цан трейд” ХХК-ийн цаад эзнээр ардчиллын алтан хараацай С.Зориг агсны гэргий Б.Булганыг тодруулж байв.
Учир нь тус компани Увс аймгийн Өмнөговь сумын нутагт Бургалтай хэ­мээх орд газарт олборлолт явуулж байжээ. Цагтаа Эр­дэнэт, Оюу толгойгоос их нөөц­тэй хэмээн яригдаж байсан Бургалтайн ордод ганцхан “Дацан трейд” ХХК олборлолт явуулах эрх авчээ. Улмаар “Дацан трейд” ХХК үйл ажиллагаагаа эхлүүлэх үед С.Зориг агсны гэргий Б.Булган гүйцэтгэх захирал Д.Баянбаттай хамт ирж очдог болжээ. Гэхдээ энэ асуудл­ыг нэг их дэвэргэлгүй нам­жаасан гэдэг юм билээ.
Ямартай ч бид Ерөнхийлөгч Ц.Элбэгдоржид дээрх уриалгаа үргэлжлүүлэн хүргэсээр байх болно. Хэрэв Ерөнхийлөгч Ц.Элбэгдорж ийм хууль санаачилж, батлуулж чадвал Монгол Улсын иргэн бүр Үндсэн хуулиар олгогдсон газрын баялгаас тэгш хүртэх нөхцөл бололцоо бүрдэх биз ээ.

Үргэлжлэл бий