Дэлхий дээрх ашиглагдаагүй үлдсэн коксжих нүүрсний цөөн тооны аварга том ордын нэг нь Өмнөговь аймгийн

Цогтцэций сумын нутаг дэвсгэрт бий. Нэр нь Тавантолгой. Мэдээж Тавантолгой ордын тухай сонсоогүй монгол хүн байхгүй биз ээ. Тэрчлэн эдийн засгийн эргэлтэд оруулж эхэлж буй энэ ордыг нутаг дээрээ үүцэлж ирсэн Цогтцэций сум ч олны танил болоод байгаа гэхэд болно. Нэг талаас ашигт малтмалын их баялагтай  “төрсөн”-ийхөө шимийг хүртэж байгаа ч, нөгөө талд горыг нь ч амсаж байгаа сум ч гэхэд болох юм.

Тэрчлэн Цогтцэций суманд газрын үнэ тэнгэрт хадчихсан. Тус суманд зочид буудал, дэлгүүр барих сонирхолтой этгээдүүд хэдэн зуугаар тоологдохын хирээр Цогтцэцийгийн газрын үнийг хөөргөдөж,  авлига сэлтээр шийдвэрлэх замдаа орсоныг нутгийн иргэд хэлдэг. Тэгвэл газар нь хамгийн өндөр үнэтэй  сумын Засаг дарга  Г.Цог-Өрнөх сар шинийн өмнөхөн газартай холбоотой авлигын асуудлаар шалгагдан Ганц худагт арав гаруй хоноод гарч иржээ. Сонирхолтой нь, түүнийг Ганц худагаас суллагдаад, сумандаа онгоцоор буухад нь Өмнөговь аймгийн засаг дарга н.Бадраа, Ноён сумын Засаг дарга эрхэм, мөн Саус гоби сэндс компанийн орон нутаг дахь бүрэн эрхт төлөөлөгч  н.Бадралтхүү, бүр сумын цагдаагийн залуучууд гэхчлэн зүсэн зүйлийн хүмүүс тосч авсан нь сумын иргэдийн хараанаас мултарч дийлсэнгүй. Гартаа цэцгийн баглаа л атгаагүй болохоос, яг л  Хөдөлмөрийн баатар болоод ирж буй даргаа угтаж байгаа юм шиг хөгжил хөөртэй зогссон тэдгээр эрхмүүдийг  “Г.Цог-Өрнөхтэйгээ нийлж хууль бус элдэв зүйлсийг хийдэг болоод л” тосч авч байгаа биз хэмээн хардахаас өөр аргагүй байгааг сумын иргэд хэлж байсан юм. Дахиад л сонирхолтой зүйл өгүүлэхэд Г.Цог-Өрнөх дарга суллагдсаныхаа дараахан Алтангадас одонгоор энгэрээ мялаалгасан юм

Газрын бизнест нэр холбогдож, авлигын хэргээр шалгагдсан ч, суллагдсан  Засаг дарга Г.Цог-Өрнөх эрхмийн  хэлж буйгаар тус суман дахь  А зэрэглэлийн бүс дэх газар олголт дуусч, Б зэрэглэлийн бүсэд нь  газар байгаа гэх юм билээ. Мөн тус суманд 500 ам.метр буюу иргэн бүрийн өмчлөх ёстой 0,7 га-гаас жижигхэн хоосон газар 10 сая төгрөгийн үнэтэй байгаа талаар тодруулахад :“Бид иргэн бүрт үнэ төлбөргүй газар өмчлүүлэх хуулийн дагуу газрыг нь өмчлүүлж байгаа. Иргэн хүн өөрөө тэр газраа ямар үнэлэмжтэй байлгах, яаж ашиглах нь хувь хүний асуудал” гэсэн хариултыг өгч байсан түүнийг хуулийн байгууллага шалгах болсоны ард хувийн эрх ашгаа бодсон хариуцлагагүй үйлдлүүд нуугдаж байгааг үгүйсгэх аргагүй байгаа юм.

Уг нь Г.Цог-Өрнөхийг харьцангуй боловсролтой, наанатай цаанатай дарга гэж иргэд нь хэлдэг. Уул уурхайгаас болж байгалийн унаган төрхөө гээж байгаа сум орныхоо төлөө дуугарахгүй биш дуугардаг дарга гэж хэлэгсэд бий ч, тэр дарга нь нэр цэвэр байж чадсангүй. Өмнө нь Ажнай Д.Бат-Эрдэнийн туслах явсан, өдгөө орон нутгийн өмчит Тавантолгой компанийн ТУЗ-д багтдаг  Г.Цог-Өрнөх дарга одоо ч, хуулийн байгууллагад үргэлжлүүлэн шалгагдаж байгаа юм билээ.

Э.Анир

mass.mn