-ЗОДУУЛСАН ХҮҮГИЙНХЭЭ ТӨЛӨӨ СЭТГЭЛЭЭ ЧИЛЭЭСЭН ЭХ ХОРВООГИЙН МӨНХ БУСЫГ ҮЗҮҮЛЖЭЭ-

Хүн сонсохоос ч сэрдмээр хэрэг гарчээ. Энэ сарын 5-нд буюу өнгөрөгч баасан гаригийн 19.00 цагийн үед Баянзүрх дүүргийн “Хо Ши Мини” нэрэмжит Улсын тэргүүний 14 дүгээр сургуулийн долдугаар ангийн сурагчид багахан маргаанаас болж хоорондоо муудалцаж нэгнийхээ биед хүнд гэмтэл учруулсан байна. Тус сургууль гурван ээлжээр хичээллэдэг бөгөөд орой зарим ангийн эхнийх нь 18 цагийн үед тарсан юм байна. Хичээлээ тараад долоогийн “Г” ангийн хэсэг хүүхдүүд сургуулиас зүүн тийш байрлах РС тоглоомын газар руу явцгааж. Тийш явах замдаа “В” бүлгийнхээ н.Маргад гэх хүүхэдтэй багахан үг сөрсөн бололтой юм даг. Тэгээд хүүхдүүд зайтайхан газар очиж хэн нь дийлэхээ үзэхээр Шинжлэх ухааны хүрээлэнгийн тийш очиж биеэр ойролцоо хохирогч гэх н.Цоодол, Ж.Маргад нар хоорондоо зодолджээ.

Ж.Маргад нь өмнө нь н.Цоодолоос мөнгө нэхэх, чихнийх нь хажууд байдаг ургацаг болох урыг харж байнга шоолдог байж л дээ. Өст хүн өлийн даваан дээр гэгчээр тэр өдөр нөгөө хоёр хоорондоо зодолдож н.Цоодол нь Ж.Маргадаа багагүй шоглочихсон аж. Тэд бие биенийхээ нүүрийг маажилцаж үснээсээ зулгаалдан хөерхен бокедсон юм байх. Тоолбол нас чацуу төөлбөл бие ойролцоо мань хоёр нэлээд үзэлцсэний дараа хамт явсан найзууд нь нанчилдааныг салган гэр гэрийн зүг явцгаажээ. Гэтэл Ж.Маргад нь Офицеруудын ордны автобусны буудалд н.Цоодолд хөөрхөн гүвүүлсэндээ шаралхан уйлаад зогсож байтал оройн ээлжийн хамгийн сүүлийн анги болох долоогийн “Б” бүлгийн хүүхдүүдтэй тааралдсан ажээ.

Ж.Маргадаас учрыг лавлахад н.Цоодолыг ангийнхантай нийлэн найзыг нь зодчихлоо хэмээн хов хүргэхэд нөгөө хэд нь бөөнөөрөө очин зодуулсан найзыгаа хамгаалахаар н.Цоодолыг бүлэглэн зодсон байх юм. Нарийн учрыг сайн ойлгоогүй Ж.Маргадын найзууд гэх н.Баяржаргал, н.Болд-Эрдэнэ нар гол рольд тоглон н.Цоодолыг нүүр нүдгүй балбаж, үснээс нь туг тугаар нь зулгаан 12 настай хүүхдүүдээс гарамгүй зэрлэг байдлаар нэгнээ зодож хүнд гэмтээжээ. Зодуулсандаа шар нь хөдөлсөн Ж.Маргад нь н.Цоодолын чихний хажууд байрлах ургацагыг тасдаад хаячих хэмээн уулгалж байсныг бодоход нэлээд ууртай нэгэн бололтой.

Ийнхүү үеийнхээ найз нарт зодуулсан н.Цоодол гэртээ харихад ээж нь айх, гайхах зэрэгцэн учир явдлыг тодруулахаар 14 дүгээр сургууль дээр хүүхдээ дагуулаг ирсэн боловч нэгэнт ажлын цаг дууссан байсан тул багш нар байгаагүй аж. Тиймээс жижүүрт нь байдлыг хэлэхэд тэрээр нийгмийн ажилтандаа дуулгахыг хүсчээ. Ингээд н.Цоодолын ээж нь жижүүрээс нийгмийн ажилтны утасны дугаарыг авч болсон бүх үйл явдлыг утсаар хэлсэн гэнэ. Нийгмийн ажилтан нь ямартаа ч хүүхдээ маргааш хурдан эмчид үзүүлээрэй, зодоонд оролцсон хүүхдүүдийнх нь нэрийг аваад нэг дэх өдөр асуудлыг тодруулж уулзалдахаар болжээ. Нэг өдөр нь нийгмийн ажилтан болсон үйл явдлыг тодруулахаар анги удирдсан багш болон зодолдсон хүүхдүүдтэй уулзаж хэрэг гарах болсон шалтгааныг тогтоосон байна.

Хэргийн эзэд зодоон болсон шалтгаанаа дээр дурдсантай адил багш нартаа өчжээ. Хохирогч н.Цоодолын ээж сургууль дээр нь ирж холбогдох хүмүүстэй нь уулзаж чухам энэ зодоонд хэн буруутай болохыг нь магадлах гэсэн боловч хүүгээ зодуулсандаа нэлээд бухимдан даралт нь ихэсч биеийн байдал нь хүндэрсэн байна. Ингээд сургуулийн эмчид үзүүлэхэд даралт нь 130 / 160 -тай маш өндөр байсан тул яаралтай түргэн дуудаж дүүргийн эмнэлэг рүү хүргүүлжээ. Түргэн тусламжийнхан иртэл сургуулийн эмч эм уулган тайвшруулсан ч даралт нь буурахгүй багагүй сандаргасан гэнэ. Эмнэлэгт очин тусламж авсан боловч угаас өндөр даралттай тэрээр хүүгийнхээ зодуулсныг хараад тайвширч чадалгүй амьсгал хураасан эмгэнэлт явдал болжээ. Үхтэл үр харам гэж хүүгийнхээ төлөө сэтгэлээ чилээсэн эхийн сэтгэл, эмнэлгийн тусламж авсан ч үеийнхээ нэгнийг зэрлэгээр зодсон байгааг хараад тэвчиж чадалгүй бухимдсандаа ийн мөнх бусыг үзүүлсэн байх юм. Хохирогч н.Цоодол нь ээжтэйгээ хамт амьдардаг байж. Аав нь Солонгос улсад ажилладаг ч эмгэнэлт явдлыг сонсоод хүүдээ ирж байгаа сурагтай. Ямартаа ч хүн сонсоход гайхмаар ийм нэгэн хэрэг гараад долоо ч хоноогүй байна. Хохирогч болохоос гадна эх үрийн хагацал үзнэ гэдэг харамсмаар.

Энд нэг зүйлийг тэмдэглэмээр санагдана. Багш нар цалингаа нэмүүлэх гээд тэмцэж байхад хүүхэд эзэнгүйдсэн юм биш биз. Зодоонд оролцсон хүүхдүүдийн ар гэрийн байдлыг сонирхвол ихэнх нь гэр бүл салалтаас болж аав, ээжгүй өсчээ. Тэгэхээр өсвөр насны хүүхдүүдэд гэр бүлийн хүмүүжил, ихэнх цагаа өнгөрөөдөг сургууль хамт олон ямар чухал гэдгийг онцолъё.

О.ЖАРГАЛ