Монголчууд Оросын ТНТ телевизийн “Зөн билгийн тулаан” нэвтрүүлгийг үзэхээр үдэш бүр цэнхэр дэлгэцийнхээ өмнө сууна. Тус нэвтрүүлэг ч үзэгчдийнхээ тоогоор Оросын телевизийн нэвтрүүлгүүд дунд чамгүй дээгүүрт жагсдаг аж. Оросын “Зөн билгийн тулаан” 12 дахь удаагийн шоу нэвтрүүлэг өнгөрөгч амралтын өдрөөр ТНТ телевизийн эфирээр цацагдаж эхэллээ. Үүнийг онцолж байгаагийн учир нь энэ удаагийн “Зөн билгийн тулаан”-д Монгол бүсгүй хүч үзэж байгаад оршино. Түүнийг удган Г.Түдэв гэдгээр нь манайхан андахгүй болсон. Яагаад гэвэл энэ бүсгүй Монголын зөн билгийн тулаанд амжилттай оролцож, түрүүлж байсан удаатай. Харин энэ удаа тэрээр Орост очиж, тус нэвтрүүлгийн шалгаруулалтад оролцсон бөгөөд шилдэг аравт багтаж чадсан байна. Тус нэвтрүүлгийн шилдэг аравт гол төлөв Оросын муж, хотуудаас шалгарсан зөн билэгтнүүд багтсан бөгөөд цорын ганц гадаад зөн билэгтэн нь Г.Түдэв ажээ. Түүний талаар Оросын http://bitvaekstrasensov.su/ сайтад “12 дахь удаагийн Зөн билгийн тулаан” нэвтрүүлгийн хамгийн ер бусын оролцогч нь Монголын удган Түдэв юм. Түдэв сүнснүүдтэй ярилцаж чаддаг. Ингэж ярилцахын тулд хэнгэрэг ашигладаг. Тэрбээр үргэлж нүүрээ халхалдаг нь сүнсний нүдтэй таарч болохгүйтэй холбоотой байдаг” хэмээн бичжээ. Монгол удган Г.Түдэвийн оролцож буй “Зөн билгийн тулаан” шоу нэвтрүүлгийг баасан гаригийн үдэш бүр орон нутгийн цагаар 20.00 цагаас Оросын ТНТ сувгаар хүлээн авч үзэж болох юм.
Н.Бямбасүрэн