Ухнаагийн Хүрэлсүх “Улаанбаатар таймс” сонинд Эх орончдын өдөрт зориулан “жинхэнэ” эх орончийн дүрд хувирч омогшил дүүрэн ярилцлага өгөхийг оролджээ. Угтаа бол энэ сайхан өдөр Монгол орны ирээдүй хойчийн төлөө цусаа урсгаж, гавьяа байгуулсан өвөг дээдсээ эргэн дурсч, арга ядлаа гэхэд Ардын намын байгуулсан түүхэн үүргийг цухас дурдаж болох байлаа. Гэтэл түүний яриа үүнээс хадуурч, хэн нэгнээс өшөө авах тухай хонзогнолоор дүүрэн болж, энэ бүх өс хонзонгоос болж золтой л дэлбэрчихээс наагуур байсан тул уушгаа нээж, дотроо онгойлгохыг хүссэн нь тэрхүү ярилцлагаас тодорхой харагдана. “Улаанбаатар таймс” сонины байрыг экс Ерөнхийлөгч Н.Энхбаяр тэргүүтэн хууль бусаар хувьчилж авсан гэх асуудлыг сөхөж, хууль хяналтын байгууллагад түүнийг шалгуулахаар “шүрүүптсэн” гол хүн бол Хууль зүй, дотоод хэргийн сайд Ц.Нямдорж бус харин намын генсек У.Хүрэлсүх байсан гэдэг нь хэнд ч ойлгогдохоор байна.

“Даравч далдайна, булавч бултайна” гэдэг шиг Н.Энхбаярыг Ерөнхийлөгч байхдаа түүнийг шоронд хатаахыг санаархсан тухай тэр зоримогхон дуугарч одоо харин нүглээ наминчилж, түүний үр хүүхэд, хань ижлийн өмнө юу хийснээ бодон санааширч, улмаар хүний муу үздэг хүн өөрөө шоронд ороход хүрдэг юм гэх зэрэг санааг шулуухан илэрхийлжээ. Гэтэл байр нь балгас болсон “Улаанбаатар таймс” сонины газрын хувьчлалыг Нийслэлийн өмчийн газраас нэн яаралтай дахин явуулсан болоод ТВ5-ын сэтгүүлч Б.Дагиймаад 500 сая төгрөгөөр өгсөн гэх яриа чих дэлсээд удаж байна. Харин түүний цаад нууц ноёнтон нь ноён генсек У.Хүрэлсүх өөрөө гэх хардлага улс төрийн хүрээнийхний дунд төрсөн нь нууц биш.

Тэрбээр өшөө хонзон авахыг хүсч байгаагаа ил тод зарлахын учир нь аль хэдийнэ санасандаа хүрч, сарвайснаа авсан нь тодорхой болсны илрэл биш гэж үү? Н.Энхбаярын хувьчилж авсан гэх Д.Сүхбаатарын хэвлэх үйлдвэрийн барилгыг хэрвээ тэр өөрийн болгож авсан бол одоо түүнд Н.Энхбаяраас өшөөгөө авч, МАН-ыг сонгуульд ялуулах л хүсэл мөрөөдөл үлджээ. У.Хүрэлсүхийн луужин Н.Энхбаярыг шоронд хатаах ёстой гэж заасан бололтой.
А.Дохио wikimon