Үндэсний статистикийн хорооноос Улаанбаатар хотод өнгөрсөн сард ХДХВ/ДОХ-ын хоёр тохиолдол бүртгэгдсэн талаар өчигдөр мэдээллээ. Гэвч манайхан энэ тоонд нэг их цочирдохоо больжээ. Өнөөдрийн байдлаар улсын хэмжээнд ДОХ-ын 243 тохиолдол бүртгэгдэж байгаа аж.

Хамгийн анх 1992 онд ОХУ-д сурч байсан ижил хүйстэн монгол залуу найз залуугаасаа ДОХ-ын вирус авсан байдаг. Түүнээс зургаан жилийн дараа буюу 1997 онд Камеруны иргэдэд биеэ үнэлсэн биеэ үнэлэгч эмэгтэй уг вирусээр халдварласан тухай мэдээллүүд байна. Одоо бол хот хөдөө ялгалгүй энэ тоо өссөөр…

Дархлалын олдмол хомсдол буюу ДОХ нь ХДХВ буюу хүний дархлал хомсдлын вирусээр хүмүүст халдварлаж, дархлалын тогтолцоог гэмтээснээс үүддэг өвчин. Энэ өвчний төгсгөлийн шат нь тухайн хүнийг аливаа халдвар болон хавдрын өвчний эсрэг хамгаалах чадваргүй болгодог. ДОХ болон ХДХВ-ийн эсрэг эмчилгээ нь зөвхөн вирусийн хөгжлийг саармагжуулах л төдий байгаа бөгөөд одоогоор мэдэгдэж буй бүрэн төгс эмчилгээ байхгүй байна. Гэвч манайд хэзээ эдгэрэхгүй энэ вирусээр өвчлөгчдийн тоо нэмэгдсээр байна.

Гэтэл холбогдох байгууллагууд нь ДОХ/ХДХВ-ийн халдвараас урьдчилан сэргийлэх, ухуулан сурталчлах, тандах, илрүүлэх, тархалтыг бууруулах талаар ямар нэгэн арга хэмжээ авч чадахгүй хэвээр байна. Нэг үгээр хэлбэл аль хэдий хяналтаас гарчхаад байгаа энэ өвчний эсрэг бид тоолж, толгой сэгсрэхээс өөр зүйл хийж чадахгүй байна.

Тоотой хэдхэн  Төрийн бус байгууллагууд төсөл хэрэгжүүлж, сургалт, семинар зохиож байгаа ч гарын авлага, сурталчилгааны цаасан хэвлэл тараадаг. Хэвшил болсон мэт эдгээр арга хэмжээ хангалттай хэмжээнд биш. Сар тутамд тоогоо нэмсээр байгаа энэ өвчний эсрэг хийж хэрэгжүүлж байгаа ажил үүгээр хязгаарлагдаж байгаа харамсалтай.

Тэгэхээр эдгээр тараах материалаас илүүтэй орон даяар ДОХ-ын шинжилгээний үнэ төлбөргүй аян зохион байгуулах, эрт оношлогооны ач холбогдлын талаар ухуулан таниулах ажиллагааг зохион байгуулах шаардлага тулгаад байна. Учир нь халдвартай таван хүн тутмын гурав нь өөрийгөө халдвар тээгч гэдгээ мэдээгүй байдаг судалгаа бий. Гэвч  манай эрүүл мэндийн байгууллагууд ДОХ/ХДХВ-ийн халдвар илэрвэл тоо тэдээр нэмэгдлээ гэх албан мэдээг гаргачхаад л сууж  байгаа нь харамсалтай. Энэ  жишиг таны үед ч үргэлжилсээр байна эрхэм сайд аа.

А.Цогцэцэг сайд та, одоогоос жил хүрэхгүй хугацааны өмнө ДОХ/ХДХВ-ийн халдвартай хүний тоо 219 болсон тухай мэдээлсэн. Тэгвэл энэ тоо өнөөдөр 24-өөр нэмэгдээд байна. Манай улсын хувьд  Бэлгийн замаар дамжих халдварт өвчинтэй тэмцэх хууль эрх зүйн орчин хангалттай хэмжээнд бүрдсэн гэдгийг албаныхан хэлдэг. Тэгэхээр хуулийн хэрэгжилт хангалтгүй байгаад А.Цогцэцэг та дүгнэлт хийх биз ээ.

П.ГОО

Оллоо.мн