Статусаа мэддэгүй малнууд юм байх даа, Ж.Эрдэнэбатын Засгийн газрын ажлыг Ерөнхийлөгчийн сонгуулиар дүгнэж үзсэн, тэр хэрээр Ерөнхийлөгчийн сонгуулиар ард түмэн Засгийн газарт дүн тавьж, М.Энхболд унасан гэх юм. Тэгээд ч зогсохгүй Засгийн газартай хариуцлага тооцно гээд дайраад байх юм. Ерөнхийлөгчийн сонгууль Ж.Эрдэнэбатын Засгийн газарт юуны хамаа байна,аа. Хэрвээ хариуцлага тооцох хүн хайгаад байгаа юм бол өрсөлдөгч АН-аас нэр дэвшсэн Х.Баттулгын талд ажилласан У.Хүрэлсүх байгааг яагаад мартчихав. Намаасаа төдийгүй МАН-д итгэл үнэмшлээ өгсөн мянга мянган гишүүдийн үзэл баримтлал дээр гишгисэн У.Хүрэлсүхэд хариуцлага тооцооч. Тэр ч бүү хэл Ерөнхийлөгчийн сонгуулиар намынхаа эсрэг ажиллачихаад өдгөө намын даргын суудалд санаархаж, сул дорой гишүүдийг уруу татан Засгийн газрыг унагаах ажиллагаа эхлүүлээд байна. Доройтсон эдийн засгийг босгох замынхаа уулзвар дээр ирчихсэн, олон төсөл хөтөлбөр боловсруулаад зарим нь гараанаас гарч байгаа энэ чухал үед Засгийн газрыг огцруулахаар улайрч байгаагийн цаана зөвхөн хувийн эрх ашиг л байна.

У.Хүрэлсүхийн хамтрагчид болох “Херо” Б.Баатар, Ерөнхийлөгч Х.Баттулга нар “Топор” нэр хайрлачихсан байгааг хэвлэл мэдээллийн хэрэгслээр мартахгүй болтлоо цацагдлаа. Тэгэхээр У.Хүрэлсүх нь Х.Баттулгын захиалгаар Ж.Эрдэнэбатын Засгийн газрыг огцруулах ажиллагааг удирдаж байгааг харж болно. У.Хүрэлсүхийн командаар хөдөлж байгаа 30 гишүүнийг харахад дандаа улстөрд шинэ гарууд. Баруун зүүнээ мэдэхгүй эргүүтсэн нөхөд. Байр сууриа илэрхийлж байгаа зарчмаа ч мэдэхгүй. Ямар сайндаа л Ерөнхийлөгчийн сонгуульд ялагдсан шалтгааныг Ж.Эрдэнэбатын Засгийн газраас хайж байхав дээ. Харин ч Ж.Эрдэнэбатын Засгийн газар эдийн засаг нь хасах цэнэгтэй байхад өнөөдөр таван хувьд авчирсан бодит өсөлттэй, гадаадын хөрөнгө оруулагчдын нүүрийг наашаа харуулчихсан байхад энэ Засгийн газраас чухам ямар өө хайгаад байгааг ойлгох юм алга.

Үнэхээр л МАН-ын гишүүд мөн болоод Ерөнхийлөгчийн сонгуулийн ялагдлын шалтгааныг олж тогтоох гээд байгаа бол “Хэргийн эзэн хэнгэргийн дохиур” нь У.Хүрэлсүх гэгч байж л байна. Бөх Ерөнхийлөгчтэй хавсран МАН-ыг булшлахаар улайрч байгаа энэ нөхөрт намынх нь гишүүд хариуцлага тооцож, намаасаа хөөх хэрэгтэй. Та бүгдийн итгэл үнэмшлээ өгсөн улстөрийн туршлага бүхий намыг чинь булшлахаар улайрч байгаа нөхрийг арай дэмжихгүй биз гэж найдая. АН У.Хүрэлсүхийн гараар МАН-ыг устгуулах  төлөвлөгөө хэрэгжүүлж байгааг мэдэхгүй УИХ-ын 30 гишүүн байгаад харамсаж байна. Хамгийн наад зах нь Ерөнхийлөгчийн сонгуулийн кампанит ажлыг Засгийн газрын ажилтай хольж хутгаад хаанаас хариуцлагаа нэхэхээ мэдэхгүй байгаад л харамсаж байна.

Х.Баатар