Хүндэрсэн эдийн засгийг сэхээнээс гаргаж, нийгэмд бодит тусгалаа өгсөн олон ажлыг богино хугацаанд амжуулсан Ж.Эрдэнэбатын Засгийн газрыг огцруулахаар МАН-ын бүлгийн нэр бүхий 30 гишүүн өргөх бичиг үйлдчихлээ. Үйлдээд зогсохгүй УИХ-ын дарга М.Энхболд шалтгаантай учраас Дэд дарга Я.Санжмятавт өргөн барьсан. Намынхаа даргыг эзгүйчлэн өргөн барьж байгаа хандлага ч нийгэмд сайнаар нөлөөлсөнгүй. Нийгэм, эдийн засгийг өөд татаж хөл дээр нь босгох сууриа нэг жил гаруйн хугацаанд тавьсан Засгийн газраа огцруулах тухай бичиг өргөн бариад гүйлдэж байгаа гишүүдийг сонгогч олон чухам яаж харж байгаа нь тодорхой. Илүү сайн ажиллаж, зассан суурин дээрээ бодит үйл хэрэг мандуулахыг хүсэх ёстой тангараг өргөсөн УИХ-ын гишүүд ийнхүү огцрох тухай бичиг үйлдсэний цаана чухам ямар ашиг байна вэ гэхээр улс эх орон, ард түмэнд эерэг тусах зүйл огтхон ч үгүй. Гагцхүү өндөр дээд албан тушаал хүссэн нэгний захиалгаар зөөлөн суудал хүссэн учраа мэдэхгүй нөхөд л зогсож харагдана.

Уг нь ард түмнээсээ сонгогдсон энэ 30 нөхөр ийн ажиллах арга барилаа олж аваад байгаа засгаа унагаах тухай ярьж байснаас харин ч дэмжиж, тал талаас нь түших ёстой. Энэ бүхний цаана Шадар сайд У.Хүрэлсүх хэмээх нөхөр бий. Тэрбээр саяхан болж өнгөрөсөн Ерөнхийлөгчийн сонгуулиар Х.Баттулгатай хавсран намынхаа даргыг унагаад авсан. Тэдний дараагийн төлөвлөгөө бол МАН-ын Засгийн газрыг унагаах байсан учраас 30 нөхөр Х.Баттулга, У.Хүрэлсүх нарын шахалтаар гарын үсэг зурчихлаа гэж харж болохоор. Үүний дараагийн төлөвлөгөө бол Засгийг унагаад АН-ыг засагт урих юм байна гэдэг нь харагдана. МАН-ын 65-ын бүлэг АН-д найр тавьж засагт урьж байгаа зэрэг улстөрийн галзуу гэмээр төлөвлөгөөгөө биелүүлэхийн тулд У.Хүрэлсүх намаа самраад зогсохгүй, эх орон, ард түмнийхээ амьдралыг самрахаар харагдана. Харж байхад улстөрийн туршлагатай намын нялх голдуу гишүүд ийнхүү АН-ын захиалгаар Засгийн газраа унагаах гэж байгаад харамсаж байна. Нөгөө талаар АН-ын цаад төлөвлөгөө бол нялхасаар гал өдөөгөөд улмаар МАН-ын дунд хагалан бутаргах ажиллагааг хийж байгаа нь илт боллоо. У.Хүрэлсүхийн хувьд ч АН-д Х.Баттулгад өртэй учраас ийнхүү ордонтойгоо ч бүрэн танилцаж амжаагүй шинэ голдуу гишүүдийг өмнөөсөө турхирлаа. Ж.Эрдэнэбатын Засгийн газрыг огцруулах нь нийгэмд ямар хортойг энэ мэт нялхасууд яаж мэдэх билээ дээ.

Өргөх бичиг үйлдсэн гишүүдийг харж байхад нялхасаас гадна дандаа албан тушаал горилогчид харагдана лээ. Улстөрд олон жил болж доль цохисон, өндөр дээд албан тушаалд азаа үзэхээр шийдсэн нөхдийн хувьд дүүрсэн хэрэг. Улстөрийн сүүлчийн сумаа тавьж байгаа хэрэг биз ээ. Харин Сонгинохайрхан дүүргээс сонгогдсон Н.Учрал, Х.Нямбаатар, Хэнтийгээс сонгогдсон Л.Оюун-Эрдэнэ гээд учраа мэдэхгүй залуусын хувьд чухам ямар зорилгоор ийнхүү ард иргэдийнхээ өөдөөс турхирч байгааг мэдэх юм алга. Сонгуулийн үеэр чухам л эв эеийг хичээж, эдийн засгаа сайжруулах тухай л ярьж явсан санагдана.

Үүнээс гадна Н.Амарзаяа, М.Оюунчимэг нарын нөхөд бол ёстой юугаа ч мэдэхгүй зогсож байгаа болов уу. Энэ мэт олон гишүүд учраа мэдэхгүй, цаана нь ямар хортойг мэдэхгүй гар хөлийн үсгээ өгснөөс гадна өмсөж явсан дотуур өмдөө мартаж санадаг Д.Гантулга гэж учраа мэдэхгүй банди хүртэл гарын үсэг зурчихсан байх юм. Энэ мэт болж байгаа процессоос харахад албан тушаал байвал ард түмэн, эх орон хамаагүй болсон бололтой.

Х.Баатар