90 гаруй жилийн туршид Монголын ард түмний олонхийн хүслийг нь биелүүлэгч “Алтан загас”-ны дүрд хувилаад байсан МАН-ыг Доржзодов гэх нэгэн залуу гэнэт “зодож” багийг нь хуулж, “зэс”-ийг нь цухуйлгаад удаагүй байна.

МАН-ыг “зодох” болсон тэр залуугийн хувийн бодол, цаад санаа зорилго юу байсан нь хамаагүй, хамгийн гол нь МАН-ын багны цаана “МАНгас” нуугдаж байсныг ил гаргаж өгсөнд олон түмэн түүнд ихэд талархалтай байгаа нь мэдээж.

Доржзодовын дэлгэсэн дуулиант 90 минутын бичлэг, түүний араас цуварсан олон “хэрүүл”-ээс МАН хэн ч үл таних “баг”-тай, хэнийг ч үл нэвтрүүлэх “хуяг”-тай байсан нь нэгэнт ил боллоо.

МАН-ын ийм “баг, хуяг”-ны цаанаас “дордохын 7 зүйл” ил болов. Энэ нь:

1. МАН төрийн албан тушаалуудыг үнэлж, зарж борлуулж амиа тэжээдэг байжээ (Дуулиант 90 минутын бичлэг үүнийг гэрчилж байна),

2. МАН-ын зарим “лидер” албан тушаалын төлөө яахаас ч буцахгүй болсон байна (үүний тод жишээ нь одоо УИХ-ын даргын суудал дээр заларч байгаа эрхэм мөнөөс мөн),

3. МАН төрийн тусгай хүчний албыг өөрийгөө хамгаалуулах “хуяг” болгож чаджээ (Доржзодовын эсрэг тэдний явуулсан үйлдэл, М.Энхболдын  “их золголт” үүнийг нотлов),

4. МАН эв нэгдэлгүй болж, дотроо хагарч, хоорондоо тэрсэлдэж, талцан хуваагджээ (Ерөнхий сайд Шадар сайд  хоёрын харьцаа, Засгийн газраа огцруулахаар УИХ дахь МАН-ын 30 гишүүний өргөн барьсан бичиг үүнийг гэрчилнэ),

5. МАН-ын өндөр албан тушаалтнуудын зарим нь гадны луйварчидтай үгсэн хуйвалдаж баялагийг үнэгүйдүүлдэг, ард түмэнд биш цөөн хэдэн хүний эрх ашигт үйлчилдэг, төр улсын их хөрөнгийг зувчуулж оффшорт нуудаг шуналын “туламнууд” болсон байна (С.Баяр тэргүүтэй нэр бүхий улс төрчдийн баримт үүнийг нотолж байна),

6. МАН-ын өндөр албан тушаалтнууд гэм буруугаа хүлээдэггүй, шударга бус, мэлзэгчид болжээ “Үүнийг 90 минутын бичлэгийн “гол баатарууд”-ын увайгүй мэлзэл харуулж байна),

7. МАН жирийн гишүүдийнхээ шударга, үнэн үгийг сонсдоггүй, тэднийг гадуурхан хөөж зайлуулчихаад цөөн хэдэн албан тушаалтан нь орогнож суудаг “нүх” болон хувирчээ (Жирийн гишүүдийн цуглаан, эсэргүүцэл, суултууд үүнийг гэрчилнэ).