УИХ-ын гишүүн О.Баасанхүүг намаас нь хөөсөн тухай Доляа Чимэддорж гэх иргэн өөрийн фэйсбүүк хуудсаараа дамжуулан мэдээлжээ. Тэрбээр “УИХ-ын гишүүн О.Баасанхүү МАХН-ын гишүүнчлэлээс хөөгдөөд санаа амар боллоо. Нэг бохир хог цэвэрлэгдэж намаас хөөгдөж нам дотор цэвэр агаартай байна. Октябрь овогтой Баасанхүү бол МАХН-ын гишүүн биш болсон шүү !” гэсэн байна.

Харин үүний хариуд УИХ-ын гишүүн О.Баасанхүү “Өнөөдөр ёс зүй, намаас урвах, ёс суртахуун, хүн чанар сэдвээр 11:30-д лайв хийхээр төлөвлөж байна” хэмээн өөрийн фэйсбүүктэй нийтэлжээ.

Эх сурвалжийн мэдээлж байгаагаар, УИХ-ын гишүүн О.Баасанхүүг намаас хөөх тухай яриа гарсан нь Эрүүл мэндийн сайн асан, МАХН-ын Ерөнхий нарийн бичгийн даргаар ажиллаж байсан Г.Шийлэгдамба ял авсантай холбоотой гэнэ. Учир нь шүүхээс Г.Шийлэгдамбад ял оноосны дараа УИХ-ын гишүүн О.Баасанхүү түүнийг өмөөрч, “Намын санхүүжилт олохын төлөө явж байсан Г.Шийлэгдамба ял авлаа. Хайран залуу. Намын дарга Н.Энхбаяр хамгийн их баярлаж байгаа байх” хэмээн жиргэсэн юм. Үүнд нь эгдүүцсэн намын дарга нь намынхаа гишүүд, дэмжигчид рүү утас цохиж, УИХ-ын гишүүн О.Баасанхүүг хөөх тухай ярьсан гэв.

Харин ял авсан Эрүүл мэндийн сайд Г.Шийлэгдамбын хувьд ихээхэн гомдолтой байгаа гэнэ. Учир нь тэрбээр Эрүүл мэндийн сайдаас гадна МАХН-ын Ерөнхий нарийн бичгийн даргыг хамт хашиж байсан. Намын дүрмийн дагуу ЕНБД нь санхүүжилт олдог, Г.Шийлэгдамбад санхүүжилт ол гэсэн чиглэл ирсэний дагуу ийнхүү санхүүжилт авсан байжээ. Гэтэл үүнийг нь хээл хахууль хэмээн ял оноосонд ихээхэн гомдолтой байгаа талаар эх сурвалж мэдээллээ.

УИХ-ын гишүүн О.Баасанхүүг хөөсөн гэх мэдээллийг анх гаргасан иргэн Доляа Чимэддорж нь МАХН-ын дарга Н.Энхбаярын худ аж.