Батлан хамгаалахын сайд, УИХ-ын гишүүн Лу.Болд МАНАН-гийн Засгийн газарт манантай үйл ажиллагаа явуулж байхдаа америкчуудтай сүжирч, алс холын халуун цэгүүд рүү армийнхаа сор болсон хөвгүүдийг илгээж яамныхаа төсвийг зузаатгахын сацуу ямба эрхийг нь ч эдлэв. Харин одоо түүний хувьд ёстой л нэг “бод идсэн боохой” шиг хээв нэг сэтгэл хангалуун явж байна. Өнөөдөр Лу.Болдод луу жил гарах нь сонин биш ч ирэх зургаадугаар сард болох УИХ-ын сонгууль туйлын ихээр анхаарлыг нь татаж, сэтгэлийг нь гижигдэнэ. Тэрбээр Батлан хамгаалахын сайд болсноосоо хойш христийн шашны мэдээ, мэдээллээр монголчуудын тархийг угааж байсан Eagle телевизийг хувьчилж авсан нь аргагүй л нэг америкчуудтай шашин нэгт ахан, дүүс болсон мэт санагдуулна.

Чингэснээр Лу сайдын халаасанд дөрөв дэх засаглал болох телевиз, сонин, сайт гээд бүхий л талын мэдээллийн хэрэгслүүд хөнгөхөн багтаж, улмаар түүнийг ирэх сонгуульд “байлдаан”-д ороход нь найдвартай хамгаалах зэр зэвсэг нь болжээ. Тэрбээр Зам тээвэр, барилга хот байгуулалтын сайд Х.Баттулгатай нэг талаараа өрсөлдөөд байна уу гэх сэтгэгдэл төрнө. Учир нь, Дон Женко ч мөн телевиз, сайт, сонин гээд өвч зэвсэглэсэн нэгэн. Тиймээс нам нэгт нөхрөөсөө хуруу дутахгүй гэсэндээ Лу сайд байдгаараа мэрийх болжээ. Нөгөөтэйгүүр, Буддын шашныг будаа болгох гэсэн чин эрмэлзэлтэй бусдын шашныг Монголд нэвтрүүлэх томоохон үүргийг харийн холбоотнуудынхаа өмнө тэрбээр хүлээсэн байх талтай. “Телевиз мундсан биш очиж очиж муу Eagle-ийг аваад байхдаа яахав дээ?” гэх хүн ч бас таарч байна. Ингэхэд энэ олигархиудад хувьчилж авдаггүй юм гэж ер нь байна уу? Бурханыг хүртэл бусдаас харамлаж, өөрийн өмч мэт хандах нь холгүй цаг хаяанд биш аль хэдийнэ ирчихсэн байгаа нь энэ ажгуу.
Х.Балт (www.wikimon.mn)