Францад энэ сарын 14-нд Хувьсгалын өдрийн парад зохион байгуулагдах бөгөөд энэ үеэр Ерөнхийлөгч Эммануэл Макроны амийг бүрэлгэхээр төлөвлөж байсан 23 настай залууг баривчилжээ.

Өөрийгөө үндсэрхэг үзэлтэн гэж нэрлэсэн залуу өнгөрсөн сарын 28-нд баривчлагдан шалгаж эхэлсэн байна.

Улмаар цагдаад өгсөн мэдүүлэгтээ энэ сарын 14-нд нийслэл Парис хотноо зохион байгуулагдах парадын үеэр Ерөнхийлөгчийн амийг бүрэлгэхээр төлөвлөж байснаа хүлээжээ. Үүнээс гадна ислам, жүүдийн шашинтнууд, өнгөт арьстан, ижил хүйстнүүдийг ч хөнөөх болно гэж ярьсан байна. Залуу видео тоглоом сонирхогчдын хуудаст зэвсэг худалдаж авмаар байна гэж бичсэний дараа өөр нэгэн хэрэглэгч цагдаад мэдэгдсэнээр саатуулагджээ. Түүний машинаас гурван хутга олдсон байна.