Шуурхай.мн | СЕХ-ны даргын гурван өдрийн гурван өөр мэдэгдэл

Jun 28, 2017 3 comments

СЕХ-ны даргын гурван өдрийн гурван өөр мэдэгдэл

нийтлэсэн Admin

Сонгуулийн ерөнхий хорооноос өчигдөр 2017 оны Ерөнхийлөгчийн ээлжит сонгуулийн үр дүнг танилцууллаа. Мэдээж хэрэг, АН-ын Х.Баттулга 517478 санал буюу 38.11 хувь, МАН-ын М.Энхболд 411748 санал буюу 30.32 хувийн саналаар дахин санал хураалтад оролцох болсон. Харин МАХН-ын С.Ганбаатар 409899 буюу 30.19 хувийн санал авч өрсөлдөөнөөс хасагдсан гэлээ.

Гэхдээ СЕХ, түүний дарга Ч.Содномцэрэнгийн мэдээлэлтэй холбогдуулан улстөрийн зарим нам болон олон нийтийн зүгээс эсэргүүцэж байгаагаа илэрхийлж байгаа юм. Учир нь СЕХ-ны мэдээллүүд зөрүүтэй байгаа ажээ. Тухайлбал 1318511 хүн санал өгснөөс 18653 саналын хуудас хүчингүй болсон гэж байгаа. Гэтэл энэ тоогоор бол 1299858 саналын хуудас хүчинтэй байж таарах гээд байгаа юм. Харин нэр дэвшигчдийн авсан санал 1339125 байна. Эндээс зөрүү болж, 39267 санал илүү гараад байгаа юм. Ингэхээр олон нийт болон МАХН-ын зүгээс дээрх 39267 санал буюу ойролцоогоор 35000 сонгогчийг СЕХ илбэдэж гаргаж ирэв үү гэж асуугаад байгаа ажээ.

Түүнчлэн нэг чухал асуудал бол санал хураалтын орой /2017.6.26/ сонгуулийн тойрог, хэсгүүдээс тун шуурхай ирж байсан тоон мэдээ гэнэт гацсан. Ингээд МАН-ын нэр дэвшигч М.Энхболдын санал өсч, МАХН-ын нэр дэвшигч С.Ганбаатарынх таг гацаж, улмаар өглөө болоход 14 мянга гаруй саналын зөрүүтэй байсан дээрх эрхмүүдийн байр солигдож, М.Энхболд ын авсан санал С.Ганбаатарынхаас давж одсон байсан. Үүнтэй холбоотойгоор СЕХ-ны дарга Ч.Содномцэрэнгийн өгсөн тайлбарууд анхаарал татаж байгаа юм.

2017 ОНЫ ЗУРГАДУГААР САРЫН 25-НЫ 13:00 ЦАГ.

“…Ерөнхийлөгчийн сонгуулийн бэлтгэл ажил бүрэн хангагдсан. 25 мянган төрийн албан хаагч 1983 санал авах байранд ажиллана. Тоног төхөөрөмж, саналын хуудас бүгд хүргэгдсэн. Сонгогчдын нэрсийн жагсаалт бүрэн эцэслэгдсэн. Улс төрийн намуудаас 17 мянган ажиглагч ажиллана.

Дүнг 22:00 цагаас хойш СЕХ-ны байран дахь дэлгэцээр шууд дамжуулан үзүүлнэ. Саналыг 22.00 цагаас хойш дэлгэцээр секунд тутамд харуулж, мэдээлнэ”

2017 ОНЫ ЗУРГАДУГААР САРЫН 26-НЫ 00:30 ЦАГ.

“…Одоогоор нийт 1984 санал авах байрнаас 1836 санал авах байрны дүн ирээд байна. Зарим багууд дээрх санал авах байр сүлжээгүй газарт байрладаг гэсэн шалтгаанаар дүн нь ирээгүй байгаа. Улсын хэмжээнд сүлжээнд холбогдоогүй 200 гаруй санал авах байр бий”.

2017 ОНЫ ЗУРГАДУГААР САРЫН 27-НЫ 11:30 ЦАГ.

“…Санал хураалтад 1,357,788 сонгогч буюу 68.27 хувь нь санал хураалтад оролцсон. Хамгийн сүүлийн хэсгийн хорооны дүн 09:10 цагт ирсэн. Говь-Алтай аймгийн Цогт суман дээр асуулт гарсан. Тэндээс мэдээгээ дамжуулж чадахгүй байсан. “Мобиком, Юнителийн сүлжээ тасарсан гэх тайлбар өгсөн. Хорлон сүйтгэх ажиллагаанаас болж нэг хэсэг дээр мэдээ дамжуулж чадаагүй. Үүнийг шалгана”.

С.Уянга

Эх сурвалж: “Зууны мэдээ” сонин

DORJIj (June 28, 2017 5:10:43 pm )

DAHIN SONGUULIIG 6 ND HIIH NI ZUID NIITSENE BAYR NAADAM BOLJ BAIHAD YUNII YASAN SONGUULI VE YADAAD ARD TUMENIIHEE AMGALAN TAIVANIIG BODOOCH EE ! ! ! SONGUULIN YERENHII HOROO TA NART YUM BODOH TOLGOI BAINA UU NEG BOL SOGTUU YUM UU . . .

БАТ (June 29, 2017 11:51:11 am )

Сонгууль 06-р сарын 26-ны өдөр явагсан биз дээ? Гэтэл энэ сэтгүүлч УЯНГА яахаараа 26-ны 00:30 цагт 1836 санал санал авах байрны дүнг хүлээж авсан байдаг билээ.Ээдээ сэтгүүлч минь энэ мэт хайхарамжгүй ханддаг байдлаа анхаараач.

Зочин (July 01, 2017 8:55:59 pm )

Анх мэдээлж байсан, дараа нь сонгуулийн санал хураахын өмнөх өдөр мэдээлж байсан, 26 – ны шөнө мэдээлсэн, 27 – ны өглөө мэдээлсэн санал өгөх, саналаа өгсөн, саналын хуудасны тоо энэ бүхэн хоорондоо зөрөөд таарч өгөхгүй байгаа нь л баттай. Энэ юунаас болсон бэ, луйвар хийж худал мэдээлсэн гэсэн үг. Сонгуулийн хороо Монголын ард түмнийг дэндүү доорд үзэж доромжилж байна. Бид яах ёстой вэ? Засаг төр ах ч үгүй шүү дээ.