Эрүүл мэндийн хөгжлийн төвөөс жил бүр гаргадаг “Эрүүл мэндийн үзүүлэлт-2016” номын танилцуулга өнөөдөр болно.

Тус газраас эрүүл мэндийн үндсэн үзүүлэлтүүдийг олон улсын аргачлалын дагуу тооцон, дүгнэлт хийж эмхэтгэл болгон бодлого боловсруулагчдад хүргэдэг. Эмхтгэлд эрүүл мэндийн салбарын үндсэн үзүүлэлтүүдийг эмнэлгийн тусламж үйлчилгээний шатлалаар, хүн амын өвчлөлийн болон нас баралтын тэргүүлэх шалтгаануудыг бүс нутгаар гаргаж, үндэсний хэмжээнд хэрэгжиж буй нийгмийн эрүүл мэндийн хөтөлбөрүүдийн шалгуур үзүүлэлтүүдийг тооцон харуулдаг юм. Эмхтгэлд

• Монгол Улсын хүн ам 2016 оны жилийн эцсийн байдлаар 3 сая 119.9 мянга болж, нийт хүн амын 68.9 хувь нь хот суурин газар, үлдсэн 31.1 хувь нь хөдөө амьдарч байна.
• Дундаж наслалт 2016 онд 69.57 болж, эмэгтэйчүүдийн дундаж наслалт 75.10, эрэгтэйчүүдийнх 65.58 байна.
• 2016 онд улсын хэмжээнд 77803 эх амаржсан нь 2015 онтой харьцуулахад төрөлт 2631 тохиолдлоор буюу 3.3 хувиар буурсан байна. Улсын хэмжээнд 78194 хүүхэд амьд төрсөн ба 1681 нь хоёр ихэр, 27 нь гурван ихэр  хүүхэд байжээ.

• Хүн амын нас баралтын ерөнхий коэффициент 1990 онд 7.9 байсан бол бол 2016 онд уг үзүүлэлт 5.2 болж  1990 онтой харьцуулахад 2.7-аар буурсан үзүүлэлттэй байна.
• Монгол Улсад эмнэлгийн нэг оронд ногдох хүний тоо 134, нэг их эмчид ногдох хүний тоо 309 байгаа ба 10000 хүн тутмын 2749 хүн давхардсан тоогоор хэвтүүлэн эмчлэх эмнэлгийн тусламж үйлчилгээг авч, жилд 1 иргэн 5.5 удаа амбулаторийн тусламж үйлчилгээ авсан байгаа нь жилээс жилд тусламж үйлчилгээний хүртээмж өсөж байгааг харуулж байна.

Эрүүл  мэндийн үзүүлэлт” номыг Англи, Монгол хэл дээр хэвлүүлэн бүх түвшний мэдээлэл хэрэглэгчид, төрийн байгууллагууд,  олон улсын байгууллагууд, төрийн бус байгууллагууд, эрдэм шинжилгээний байгууллагуудын 300 гаруй мэдээлэл хэрэглэгчдэд  үнэ төлбөргүйгээр түгээдэг.

2016 оны “Эрүүл мэндийн үзүүлэлт”  нь нийт 15 бүлэг, 41 дэд бүлгээс бүрдэх ба хүн амын эрүүл мэндийн үзүүлэлтүүдийг нийт 97 хүснэгт, 92 зураг, 50 газарзүйн байршлын зургаар дүрслэн харуулсан бөгөөд эрүүл мэндийн үзүүлэлтүүдийг сүүлийн 10 жилийн байдлаар харьцуулан гаргажээ.

Энэ эмхтгэлийн онцлог нь Мянганы хөгжлийн зорилтын үргэлжлэл болох Тогтвортой хөгжлийн зорилтын эрүүл мэндийн үзүүлэлтүүдийг УИХ-ын 2016 оны хоёрдугаар сарын 05-ны өдрийн 19 дүгээр тогтоолоор батлагдсан  “Монгол Улсын тогтвортой хөгжлийн үзэл баримтлал-2030”-д зааснаар эрүүл мэндийн дөрвөн зорилтын хүрээнд мэдээллийг боловсруулан хүргэж буй, Эх хүүхэд, нөхөн үржихүйн эрүүл мэнд үндэсний хөтөлбөр,  Халдварт өвчнөөс сэргийлэх хянах үндэсний хөтөлбөрүүдийг үзүүлэлтүүдийг шинээр оруулан мэдээлэл хэрэглэгчдийн хүртээл болгож байна.