Ерөнхийлөгчийн сонгуулийн буухиа орон нутагт ид үргэлжилж, орон нутгийн иргэд дэмжиж буй нэр дэвшигчдийнхээ уулзалтад очин уухай хадааж, дэмжихгүй байгаа нэгэндээ эсэргүүцэл үзүүлсэн газар ч бий. Өнгөрөгч орон нутгийн сонгуулиар дийлэнх аймгуудад МАН-аас ялалт байгуулсан учраас МАН-аас нэр дэвшигч М.Энхболдын хувьд ёстой л гараас гар дээр бөмбөрөн явж сурталчилгаа хийж байгааг орон нутгаас мэдээлж байна. Арга ч үгүй, МАН-аас /Ерөнхий сайдаас/ батламжилсан аймгуудын Засаг дарга намынхаа даргыг очихоор хөлөө хугалахаас ч өөр яахав. Харин аймгуудад засаглалгүй АН, МАХН-ынхан ард түмний эрч хүчин дунд л тоостой хутгалдаж явна, зарим газарт. Тэр ч бүү хэл зарим аймагт АН, МАХН-ын нэр дэвшигчдийг ойшоон үзэхгүйгээр үл барам зарим Засаг дарга нар хүрэлцэн очдоггүй тухай ч яриа бий. Тэр ч бүү хэл эсэргүүцлийн жагсаал хүртэл зохион байгуулаад авсан газар бий. Сонгогдох сонгох эрхийн дагуу итгэл үнэмшлээ ямар ч хэлбэрээр гаргаж болох ч эцсийн дүндээ бид жагсаж хашхирах бус цаасан дээр гуравхан нэрний нэгийг дугуйлаад л итгэл үнэмшлээ өгчихнө шүү дээ.

      Уг нь бол Монгол Улсын хэмжээнд үндэснийхээ эв нэгдлийг илэрхийлэгч Ерөнхийлөгч өө сонгох хариуцлагтай ажил орон даяар өрнөж байхад аймгуудын удирдлага ийн хандах нь туйлын буруу. Иргэд ч дүүрсэн хэрэг. Энэ чинь төрийн ажил, тиймээс та төрийн хүн учраас хүссэн хүсээгүй үйлчлэх учиртай л баймаар. Харин алс баруун хязгаар Увс аймгийн Засаг дарга Д.Батсайхан гурван нэр дэвшигчийг ижил түвшинд хүлээн авч, сонгуулийн компанит ажилд орон нутгаас яаж оролцох ёстой юм тэр ном дүрмээр нь угтаж үдсэн тухай хүмүүс ярьж байна. Увсын Засаг ноён бол МАН-аас батламжлагдсан хүн. Гэтэл тэр төрт ёсны уламжлалт үүргээ ухамсарлан жинхэнэ төрийн хар хүн шиг байж чадсан нь бусдадаа үлгэр жишээ болсон сайхан явдал байлаа. Бид сонгуулийн хүрээнд хэдхэн хоног талцаж, хоорондоо заамдалдах нь холгүй аж төрж байна. Үнэн хэрэгтээ хэдхэн хоногийн дараа дэлгүүрт хамтдаа оочёрлож, хол ойрын сонин нэгэндээ дуулгаж, нэгнээсээ дуулж гээд амьдрал мөнхийн жамаараа л үргэлжилнэ шүү дээ.

С.Баяр

Шуурхай.мн