Авлигатай тэмцэх газрыг байгуулаад арав дахь жилтэйгээ золгож байна. Энэ хооронд АТГ-ын удирдлагыг дөрвөн ч удаа сольсон. Хэр баргийн аавын хүү шийр зааж очдоггүй уг албан тушаалд цагдаагийн хурандаа Х.Энхжаргал зориг гарган очсон гэж хэлж болно. Энэ албан тушаалыг эрхэлж байсан Б.Дангаасүрэн харамсалтайгаар амиа алдаж, Ч.Сангарагчаа шоронд орж, түүний карьер дууссан. Харин Н.Ганболд яагаад ч юм өөрийн хүсэлтээр албан тушаалаа өгсөн байдаг.Цагдаагийн хурандаа Х.Энхжаргалыг  хаана алба хашсан, ямар ажлыг хэрхэн сайжруулсныг хуулийнхан мэддэг. Ахлах төлөөлөгчөөс эхлээд газрын дарга болтлоо дэвшсэн тэрбээр ажилдаа хий гаргаж үзээгүй, чанд хатуу нэгэн гэдгээр нь хуулийнхан үнэлдэг.Цагдаагийн байгууллагаас буурь сэлгэж АТГ-ыг удирдах болсон Х.Энхжаргалыг шударга, зарчимч чанараараа энэ ажилд тохирно гэж албаных нь хүмүүс итгэж байсан.

Гэхдээ төдийгөөс өдийг хүртэл хийж буй ажлынхаа талаар ганц ч үг дуугарсангүй. Энэ өнцгөөс нь харвал Х.Энхжаргал авлигатай тэмцэж буй нь харагдахгүй, чимээгүй байх бодлого бариад байх шиг. Жишээ нь сонгуультай холбоотойгоор АТГ-ын тэргүүн комиссар ард түмний олон хардлагад хариулт өгөх учиртай. Тухайлбал, АТГ-аас 2016 оны гуравдугаар сард Х.Баттулгыг сэжигтнээр тооцсон. Х.Баттулга эрх мэдэл, албан тушаалаа урвуулан эрх бүхий байгууллагын зөвшөөрөлгүйгээр “Шинэ төмөр зам” бүтээн байгуулалтын ажлын хүрээнд хоёр компаниар хөрс хуулалтын ажил хийлгэсэн гэдэг. Гэхдээ эхний ээлжид өөрсдийн хөрөнгөөр ажлаа эхлүүлчих, дараа нь Хөгжлийн банкны мөнгө орж ирэхээр санхүүжилтийг шийдвэрлэж өгнө хэмээсэн бололтой юм. Тиймээс түүнийг бусдад онц их хэмжээний хохирол учруулсан байж болзошгүй гэж үзэн сэжигтнээр татсан.

Өөрөөр хэлбэл, Эрүүгийн хуулийн тусгай ангийн 263 дугаар зүйлийн 263.2-т заасан гэмт хэрэгт түүнийг буруутган шалгаад багагүй хугацаа өнгөрснийг Х.Энхжаргал тэргүүн комиссарт сануулъя. Мөн Х.Баттулгын туслах Г.Түвшинжаргал хийгээд ойр орчимд байсан хүмүүсийг хуулийнхан саатуулан шалгаж буй. Ер нь Х.Баттулга төмөр зам, аж үйлдвэрийн парк, Майдар төсөл… өөр олон зүйлд хариулт өгч, санаачилсан ажлынхаа ард гарч, ямар нэг хардлагагүй дуусгаж чадаагүй. Товчхондоо, томоохон хэмжээний хэд хэдэн төслийн мөнгийг Х.Баттулга авсан гэх хардлага бий. Энэ мэтчилэн олон нийтийн дунд дуулиан тарьж, АТГ-т очоод намжчихдаг авлигын томоохон хэргүүдээс нэг нь ч прокурорт очиж, шүүхээр шийдвэрлээгүй гэхэд хилсдэхгүй. Учир нь, дээрх хэргүүдийг шалгаж эхлэхэд ард түмэн Х.Энхжаргалд итгэсэн юм. Тиймээс Х.Энхжаргал эдгээр дуулиантай хэргийн талаар хуулийн хүрээнд хариулт өгч, ард түмний итгэл сэтгэлээр тоглоогүй гэдгээ батлах ёстой болов уу. Ер нь тэргүүн комиссар дуугүй байх бодлого барьж, алба хаагчдынхаа “амыг үдэх” нь хэнд ашигтай юм бэ. Ард түмний дунд бас нэгэн хүлээлт бий. Угтаа бол төрийн албан хаагч оффшор бүсэд данс эзэмшиж болохгүй.

Сонгууль болгоны өмнө өндөр авдаг уг асуудал АТГ-т хамаатай гэж хүмүүс үздэг. Хувийн хэвшилд ажиллаж байгаад төрийн албанд орох бол оффшор бүсэд эзэмшдэг дансаа ил тод мэдээлж, хуулийн хугацаанд дансаа хаах зэргээр асуудлыг зохицуулах ёстой байдаг. Ер нь, сургууль, цэцэрлэг, ясли эсвэл томоохон үйлдвэрийн төслийн санхүүжилт болчих хэмжээний хөрөнгийг тэрбум, тэрбумаар нь гадагш хилийн чанад руу зөөх нь энгийн үзэгдэл яав ч биш байлтай. Тэгээд ч өдгөө хэн дуртай нь жагсаал, цуглаан хийж, төрийн өндөр дээд албан тушаалтнуудыг авлигачид, оффшорчид хэмээн цоллох болсон. Угтаа бол та тэдгээр албан тушаалтныг шалгаад авлигач бол авлигачийг, цэвэр бол цэврийг батлаад өгөх нь ажлын тань үндсэн чиг үүрэг биз дээ, Х.Энхжаргал дарга аа. Гэтэл өнгөрсөн хугацаанд оффшор бүстэй холбоотой хэд хэдэн хэрэг гарсан. Товчхондоо, авлигачид баялгийг хилийн гадна гаргаад байгаа нь Х.Энхжаргал даргад хамаарах л асуудал бөгөөд хөрөнгөө хил гаргахаас нь өмнө таслан зогсоох үүрэг хүлээсэн хүн. АТГ-ыг атгаж байгаагийн хувьд тэрбээр энэ талаар ард түмэнд товч, тодорхой алин боловч мэдээлэх үүрэгтэй юм. Гэтэл мэдээлэх зүйл байхгүй юу, хүсэлгүй байна уу гэдэг нь ойлгомжгүй байсаар албаа авснаас хойш жилийн хугацаа өнгөрлөө.

Үүнээс гадна олон нийтэд ил болгох учиртай Ерөнхийлөгч, Ерөнхий сайд, УИХ, Засгийн  газрын гишүүд яам тамгын газрын  дарга , орон нутгийн прокурорын удирдлага гээд төрийн өндөр албан тушаалтнуудын хөрөнгө, орлогын мэдүүлгийг өнөөдрийг хүртэл зарлаагүй байна. АТГ-ын өмнөх удирдлагууд жил болгоны хоёрдугаар улиралд багтаан өндөр дээд албан тушаалтны хөрөнгө, орлогын мэдүүлгийг нийтэд мэдээлдэг сайн жишиг Х.Энхжаргал даргын үед царцаж байх шиг. АТГ-ын төсөв данхайж, Прокурорын дэргэх Мөрдөн байцаах албыг хүртэл дэргэдээ авч,алба хаагчдынхаа тоог нэмсэн. Мөн барилгаа ергөтгөснөөр гурван ч том байшинтай болсноос өөр бусдаар ажил хийсэн гэж харагдахгүй байна. Олон нийт уг нь Х.Энхжаргалыг хурц, шийдэмгий, шударга хэмээн дүгнэж, авлигачдын зүрхэнд шар ус хуруулна гэж хүлээж, хүсч байсансан. Даанч юун авлигачдыг цээрлүүлэх. Харин ч улам өөгшүүлж, оффшор данстай эрхмүүдийн талаарх мэдээлэл Монголд байтугай дэлхийн хэмжээнд гарсаар байна. Энэ мэтээр Х.Энхжаргал чимээгүй байж ажиглалт хийх маягаар асуудалд хандсаар байвал иргэдийн итгэл суларсаар, оффшорчдын тоо өсч нөгөө “Магтсан хүүхэн хуримандаа…” гэгчийн үлгэр болохвий.