Энэ наадмын ГОЛ ярих харах бөх Энэ жилийн наадмаар долоогийн даваанд гурван аварга зогсож гэмээнээ тунах магадлал өндөр болоод буй

Увс аймгийн Давст сумын уугуул “Алдар” спортын хороо, “Олимп” дээд сургууль, ДЦС-4 ТӨХК-ийн бөх аймгийн арслан

2012 онд Улсын Их баяр наадамд түрүүлсэн бөх. Ардын хувьсгалын жилүүдэд түүнээс өмнө улсын цолгүй бөх түрүүлсэн ганцхан тохиолдол байдаг 1955 оны наадам. Уг наадамд 256 бөх сугалаагаар барилдаж, Төв аймгийн Баянбараат сумын уугуул, залуу бөх С.Оргодол найм даван түрүүлж, шууд улсын арслан цол хүртэж байснаас хойш 57 жилийн дараа П.Бүрэнтөгс энэхүү амжилтын эзэн болсон. П.Бүрэнтөгс 2006 онд Увс аймгийн Давст суманд дунд сургуулиа төгсөж, “Олимп” дээд сургуулийн чөлөөт бөхийн ангид элсэн оржээ. Түүний үндэсний бөхийн эрдэм ухаан заасан анхны багш нь Даян аварга Агваансамдангийн Сүхбат.

Д.Рагчаа заанаар 9 даван түрүүлж, начин, харцага, заан, гарьд цолыг алгасан шууд Улсын арслан цол хүртэж байсан П.Бүрэнтөгс 2013-2014 онд бэртэл гэмтлийн улмаас сайн барилдаж чадаагүй, доогуур даваанд унасан. Хоёр жил доогуур даваанд өвдөглөсөн тэрбээр 2015 онд улсын харцага Энхтөгсийн Оюунболдод наймын даваанд унан анх удаа үзүүрлэсэн билээ. Өнгөрсөн жилийн наадмаар Р.Пүрэвдавгатай есийн даваанд маргаантай барилдаан хийн тахимаа өгсөн.
Түүний давуу тал бол чац урт, хав барьцнаас хөл мэх сайн хийдэг. Тогтоож барилдахгүй бол шууд дайраад давдаг. Сул тал нь мэхний холбоос муутай, бужигнасан барилдаанд амархан өвдөглөх гээд байдаг гэмтэй. Улсын наадамд гурвантаа шөвгөрсөн ч өндөр даваатай учраас бүх арслангуудаа манлайлдаг. Энэ жилийн наадмаар долоогийн даваанд гурван аварга зогсож гэмээнээ тунах магадлал өндөр болоод буй. Долоо, наймын давааны барилдаанууд түүнд хамгийн их хүч шавхсан, хүндхэн барилдаанууд болно.