УИХ-ын чуулганы нэгдсэн хуралдаан үргэлжилж байна. Чуулганы хуралдаанаар Эрүүл мэндийн даатгалын үндэсний зөвлөлийг байгуулж, дарга, гишүүдийг томиллоо.

Уг зөвлөлийн даргаар УИХ-ын гишүүн, Хөдөлмөр нийгмийн хамгааллын сайд Н.Номтойбаярыг томилсон юм.

УИХ-ын гишүүн Д.Тогтохсүрэн “Эрүүл мэндийн даатгалын сан жилд тодорхой үлдэгдэлтэй байдаг тул үүнийг тухайн жилд нь зарцуулдаг байх хэрэгтэй. Мөн Эрүүл мэндийн даатгалын үндэсний зөвлөлийг Эрүүл мэндийн сайд ахалдаг байх нь зүйтэй”

УИХ-ын гишүүн, Хөдөлмөр нийгмийн хамгааллын сайд Н.Номтойбаяр “Энэ бол УИХ-аас томилогдож буй дөрөв дэх албан тушаал. УИХ-ын гишүүнээс гадна Хөдөлмөр нийгмийн хамгааллын сайд, Нийгмийн даатгалын үндэсний зөвлөлийн дарга гэсэн албан тушаалыг надад оноосон. Одоо Эрүүл мэндийн даатгалын үндэсний зөвлөлийг ахлуулахаар яригдаж байна.  Энэ бол хуулийн дагуу оноож буй алба болохоос ашиг сонирхол огтоос биш” гэлээ.

Харин УИХ-ын гишүүн Д.Сарангэрэл дэмжиж байгаагаа илэрхийлсэн юм.

Чуулганы хуралдаанаар тус зөвлөлийн дэд даргаар Төрийн өмчийн бодлого зохицуулалтын газрын даргын зөвлөх Д.Дэмбэрэл, гишүүнээр Сангийн сайд Б.Чойжилсүрэн, Эрүүл мэндийн сайд А.Цогцэцэг,  Эрүүл мэндийн салбарын шинэчлэлд дэмжлэг үзүүлэх Европын холбооны төслийн Эрүүл мэндийн эдийн засгийн бодлогын шинжээч Ц.Цолмонгэрэл, Монголын сумын эмч мэргэжилтнүүдийн холбооны тэргүүн Ц.Ганхүү, “Макро эдийн засаг ба эрүүл мэнд” ТББ-ын тэргүүн Д.Чимэгдагва, Монголын эрүүл мэндийн ажилтны үйлдвэрчний эвлэлийн холбооны дарга Б.Мягмар нарыг томилсон юм.

Чуулганы хуралдаан үргэлжилж байна.

Б.Чимэг