Эмэгтэйчүүдийн баяраар төв талбай дээр офшорчдыг эсэргүүцэн хагас нүцгэн байдалтайгаар эсэргүүцлээ илэрхийлсэн бүсгүйчүүд өнөөдөр сэтгүүлчдэд мэдээлэл хийлээ. Тэд тус тэмцлийнхээ үргэлжлэлийг бүтэн нүцгэн байдалтайгаар зургаадугаар сарын 1-нд буюу “Олон Улсын Хүүхдийн Эрхийг хамгаалах өдөр” хийхээр төлөвлөсөн аж.

Тодруулбал, тухайн үед эмэгтэйчүүд УИХ-ын дэд дарга Ц.Нямдоржид албан шаардлага хүргүүлж байсан бөгөөд өнөөг хүртэл хариу аваагүй байгаа аж. Тиймээс тэд шаардлагынхаа хариуг тавдугаар сарын 31-ний дотор өгөхгүй бол зургадугаар сарын 1-ний өдөр бүтэн нүцгэлэх болсноо хэлсэн юм.

Мөн тэд “Монголчууд бид яагаад ядуу буурай амьдрах ёстой юм бэ? Өвөг дээдсийн алтан амь, бүлээн цусаа өгсөн эх орны баялгаа бид яагаад хүртэж чадахгүй байгаа юм бэ? Бид 27 жил урагшлах биш ухарчихлаа. Үүнд ээжүүд бид тайван сууж чадахгүй байна. Шударга бус, хууль бусаар ард түмнээ хуурч, мэхэлж, хохироож байгаа гадныхны гар хөл болсон төрд суусан тэдэнтэй хатуу тэмцэнэ. Хуульч Я.Бат-Ялалт сүүлийн 10 жил нийгмийг шударга болгохын төлөө ганцаараа тэмцэж ирлээ. Олуулаа бүгдээрээ энэ үзэл санаагаа өргөжүүлэн хэрэгжүүлэхийн төлөө Монголын Хүний төлөө намыг байгуулан ажиллаж байна. Ард түмэн та бүхнийгээ бидэнтэй хамтрахыг уриалж байна. УИХ-ын дэд дарга Ц.Нямдорж та бидний шаардлагыг тавдугаар сарын 31-ний дотор өгөхгүй бол бүтэн нүцгэн жагсаал хийхээ мэдэгдэж байна. Энэхүү жагсаалд 21 эмэгтэй нэгдэхээр болсон бөгөөд бид үнэхээр эцсийн шийдвэрээ гаргаж энэ сонголтыг хийсэн. Бид Ардчилсан нийгэмд ажиллаж байгаа учраас өөрсдийн дуу хоолойгоо илэрхийлэх бүрэн эрхтэй. Тиймээс бид юунаас ч айхгүй байна” гэсэн юм.